पूर्वअध्यक्षहरूको कार्यकक्ष यथावत रहन्छः लिङदेन

काठमाडौं । राष्ट्रिय प्रजातन्त्र पार्टीका नवनिर्वाचित अध्यक्ष राजेन्द्र लिङदेनको पदभारग्रहण अघि कार्यकक्षको विषयमा केहीबेर विवाद भयो । यसअघि प्रमुख अध्यक्षका रूपमा कमल थापाले प्रयोग गरेको कार्यकक्ष नदिइएकोमा लिङदेन समर्थक असन्तुष्ट बनेका थिए ।

तर, अध्यक्ष लिङदेनले भने आफ्नै इच्छामा नयाँ कार्यकक्ष बनाएको बताएका छन् । पूर्वअध्यक्षहरूको सम्मानका लागि उनीहरूको कार्यकक्ष यथावत राखिने उनको भनाइ छ ।

यो पनि पढ्नुहोस् : कमल थापाको कार्यकक्ष यथावत राखेर लिङदेनलाई अस्थायी प्रबन्ध (तस्बिरहरू)

‘उहाँहरूलाई आउँदा-जाँदा बस्न र भेटघाट गर्न सहज होस् भनेर पूर्वअध्यक्षहरूको कार्यकक्ष यथावत राख्न भनेको छु,’ उनले भने, ‘अभिभावकका रूपमा उहाँहरूको मार्गदर्शन हामीलाई चाहिन्छ ।’

राप्रपामा यसअघि तीन अध्यक्ष थिए, जसमध्ये कमल थापाले चुनाव हारे भने पशुपतिसम्शेर राणा र डा. प्रकाशचन्द्र लोहनी चुनावमा भाग लिएनन् । पार्टीको कार्यकारी पदमा अब नरहे पनि कार्यालयमा उनीहरूको कार्यकक्ष यथावत रहने लिङदेनले प्रत्याभूत गरेका हुन् ।