कांग्रेसको केन्द्रीय सदस्यमा सांसद प्रकाश रसाइलीको उम्मेदवारी घोषणा – Nepal Press

कांग्रेसको केन्द्रीय सदस्यमा सांसद प्रकाश रसाइलीको उम्मेदवारी घोषणा

काठमाडौं । नेपाली कांग्रेसका सांसद प्रकाश रसाइली ‘स्नेही’ ले १४ औँ महाधिवेशनमा केन्द्रीय सदस्यमा उम्मेदवारी दिने घोषणा गरेका छन् । बझाङबाट महाधिवेशन प्रतिनिधि बनेका उनले बुधबार नयाँ बानेश्वरमा पत्रकार सम्मेलन गर्दै समावेशी दलिततर्फ केन्द्रीय सदस्य पदमा उम्मेदवारी दिने घोषणा गरेका हुन् ।

उनी कांग्रेसका समानुपातिक सांसद हुन् । उनी १३ औँ महाधिवेशनमा पनि केन्द्रीय सदस्यको उम्मेदवार थिए । नेपाल दलित संघका पूर्व केन्द्रीय महासचिव रसाइली विद्यार्थी कालबाटै राजनीतिमा आएका हुन् । उनी नेपाल विद्यार्थी संघको केन्द्रीय सदस्य समेत भए ।

‘मैले ७७ वटै जिल्ला पुगेर पार्टीका नेता र साथीहरूसँग छलफल गरेको छु, समस्या, गुनासा र पार्टीको राजनीतिक कार्यदिशाबारे संवाद गरेको छु,’ उनले भने, ‘त्यहीआधारमा आफूले पार्टीको केन्द्रीय कार्यसमितिमा बसेर योगदान गर्न सक्छु भन्ने हिसावले उम्मेदवारी दिने निधो गरेको हुँ ।’ उनले आफू संस्थापन इत्तर समूहबाट उम्मेदवार रहेको समेत बताए । नेता रसाइलीले कांग्रेसमा सामान्य नागरिकका मुद्धा उठाउनका लागि आफूले उम्मेदवारी दिएको बताए ।

‘म आफैँ यो समाजको पिँधबाट उठेर आएको व्यक्ति हुँ । लाेकतन्त्रमा समाजका हरेक व्यक्तिको मत समान हुन्छ । चाहे त्यो विलिनियर होस् वा भरिया होस् । तिनाउ नदी किनारको सुकुम्बासी होस् वा रुपन्देहीका जमीनदार नै किन नहोऊन् । सबैको मतको अधिकार उतिनै हो । डेमोक्रेसीमा त्यो मतको कदर हुनुपर्छ,’ उनले भने, ‘त्यो मतको कदर कांग्रेसले गर्छ, तर अझै पनि ती सबै समुदायका मुद्धा कांग्रेसमा छलफल हुन सकेको छैन । त्यो समाजको पिँधमा रहेका समुदायको मुद्धा उठाउन मेरो उम्मेदवारी हो ।’

उनले कांग्रेसले सुकुम्बासी, भूमिहीन, दलित, गरिब, रिक्साचालक, खाडी मुलुकमा पुगेका सामान्य नागरिकहरू सबैको मुद्धालाई समान ढंगले उठाउनुपर्ने बताए ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर