रोल्पाकी ईश्वरी बनिन् एमालेको कान्छी केन्द्रीय सदस्य (भिडिओ अन्तर्वार्ता)

चितवन । नेकपा एमालेको अध्यक्षमा ७० वर्षीय केपी शर्मा ओली निर्वाचित भइरहेको बेला सोही पार्टीमा ३२ वर्षीया युवतीले केन्द्रीय सदस्यका रुपमा प्रवेश पाएकी छन् ।

रोल्पाकी ईश्वरी जिएम एमालेको ३०१ सदस्यीय केन्द्रीय कमिटीमा कान्छी सदस्यको रूपमा निर्विरोध निर्वाचित भएकी हुन् । २०४६ सालमा जन्मिएर २०६२ सालदेखि एमालेको राजनीतिमा लागेकी ईश्वरी १०औं राष्ट्रिय महाधिवेशनबाट केन्द्रीय सदस्य बनेकी हुन् ।

आदिवासी जनजाति महिलातर्फको कोटाबाट निर्विरोध निर्वाचित भएकी ईश्वरी नै एमालेको कान्छो केन्द्रीय सदस्य बनेकी हुन् । ४० वर्षमुनिका सीमित महिलाहरूमात्र केन्द्रीय सदस्यमा प्रवेश पाएका बेला उनी सबैभन्दा कम उमेरकी हुन् ।

२०६२ सालमा माओवादी आधार क्षेत्र मानिने रोल्पामा भूमिगत शैलीमा एमालेको संगठन विस्तार थालेकी ईश्वरीले पार्टीमा लागेको १६ वर्षमै केन्द्रीय कमिटीमा पुग्ने मौका पाएको भन्दै अब चुनौती थपिएको बताइन् ।

केही समय पत्रकारितासमेत गरेकी उनी प्रेस चौतारीको जिल्ला अध्यक्ष र नेपाल पत्रकार महासंघको सचिव रहेकै बेला पत्रकारिता छाडेर पूर्णकालीन राजनीतिमा लागेकी थिइन् ।

हामीले उनीसँग भिडिओ कुराकानी गरेका छौं ।