होटल सफारीमा प्रिन्ट भयो घोषणा गर्ने सूची, ओलीले ‘फिनिसिङ टच’ दिँदै

काठमाडौं । नेकपा एमालेका नयाँ केन्द्रीय समितिका लागि प्रारम्भिक सूची तयार भएको छ । होटल सफारीमा उपमहासचिव विष्णु पौडेलले सूची प्रिन्ट गरेर लगेका थिए । बन्द सत्र भने अझै सुरू भएको छैन ।

होटेल सेभेन स्टारमा बन्दसत्र स्थल भए पनि अध्यक्ष ओली र उनको कोर टिम भने होटेल सफारीमा होमवर्क गरिरहेको छ । ओलीसहित नेताहरू विष्णु पौडेल, शंकर पोखरेल, प्रदीप ज्ञवाली, पृथ्वीसुब्बा गुरुङ, विष्णु रिमाललगायतका नेताहरू होटेल सफारी पार्कमै छन् । यही टिमले सूची तयार पारेको हो ।

पौडेल उक्त सूची बोकेर होटेलको तल्लो तलामा आएका थिए । त्यहाँ उनले सूची प्रिन्ट गर्दै पत्रकारसँग अनौपचारिक कुराकानी गरे । पार्टीमा भएको सहमतिबारे जानकारी भने दिएनन् ।

पौडेलले यतिमात्र भने, ‘सबै राम्रो भइरहेको छ, राम्रो हुनेछ ।’

स्रोतका अनुसार पौडेलले सूची प्रिन्ट गरेर लगेपछि ओलीले फाइनल रुजु गर्ने छन् । बन्द सत्र चाँडै सुरु हुने बताइएको छ । होटेल सफारीमा रहेका पृथ्वीसुब्बा गुरुङले पनि अब चाँडै महाधिवशेन सकिने बताएका छन् ।