विश्वकप छनोटको निर्णायक खेलमा युएईले दियो नेपाललाई १२८ रनको लक्ष्य

काठमाडौं । आईसीसी टी–२० महिला विश्वकप एसिया छनोटको अन्तिम खेलमा युएईले नेपाललाई १ सय २७ रनको लक्ष्य दिएको छ ।

दुबईको आईसीसी एकेडेमी मैदानमा टस हारेर ब्याटिङको निम्तो पाएको युएईले निर्धारित २० ओभरमा ५ विकेट गुमाएर १ सय २७ रनको योगफल तयार गरेको थियो ।

युएईका लागि चामानि सेनेभिरात्नले ३६ बलमा ७ चौकासहित सर्वाधिक ५२ रन जोडेर पेभिलेन फर्किइन् । थ्रिथा सातिसले ४६ बलमा ३ चौकासहित ४७ रन, काभिसा इगोडेजले २७ बलमा २२ रन जोड्दा अन्य ब्याटरले उल्लेख्य प्रदर्शन गर्न सकेनन् ।

नेपालको बलिङमा कबिता कुँवरले सर्वाधिक २ विकेट लिईन् । त्यस्तै सबनम राई, सिता राना मगर र संगिता राईले समान १ विकेट लिए ।

नेपाललाई ग्लोबल छनोटमा स्थान बनाउन युएईलाई १० रन अथवा १० बलको फरकमा जित निकाल्नु पर्ने दबाव रहेको छ । यदि युएईसँग पराजित भएमा नेपालको विश्वकप यात्रा अधुरै रहने छ ।

नेपाल ४ खेलमा ३ जित र १ हारसहित ६ अंक जोडेर तालिकाको दोस्रो स्थानमा छ । अपराजित युएई ८ अंकसहित तालिकाको शिर्षस्थानमा छ ।
नेपाल पहिलो खेलमा हङकङसँग ६ विकेटले पराजित भएको थियो । दोस्रो खेलमा भुटानलाई ८ विकेटले हराउँदा कुवेतलाई ९ विकेटले पराजित गरेको थियो । अन्तिम खेलमा नेपालले मलेसियालाई ६ विकेटले पराजित गरेको थियो ।

यूएईले मलेसियालाई ३० रन, हङकङलाई ११ रन, भुटानलाई ४७ रन र कुवेतलाई ७ विकेटले पराजित गरेको थियो ।