माओवादीका संगठित सदस्य ८ लाख पुग्ने दाबी, ६ लाखको अनलाइनमा इन्ट्री

काठमाडौं । राष्ट्रिय सम्मेलनका लागि सदस्यता नवीकरण अभियान चलाइरहेको नेकपा (माओवादी केन्द्र) ले संगठित सदस्य ८ लाख पुग्ने दाबी गरेको छ ।

प्रवक्ता कृष्णबहादुर महराले अहिलेसम्म ६ लाखको अनलाइन इन्ट्री नै भइसकेको र बाँकी २ लाखजतिको हार्डकपी जिल्ला, प्रदेश हुँदै केन्द्रमा आउन लागेको बताए ।

‘पार्टी सदस्यता लिनेको संख्या उत्साहजनक पाइयो,’ महराले भने, ‘६ लाखको अनलाइन इन्ट्रि भइसकेको छ । बाँकी रहेको २ लाखजतिको हार्डकपी केन्द्रमा पठाउन भनिएको छ ।’

माओवादीले सफ्टवयेरमार्फत अनलाइनबाटै सदस्यता नवीकरणको व्यवस्था मिलाएको थियो । शुक्रबारसम्म सदस्यता नवीकरणको समय भएको भए पनि सबैको अनलाइन इन्ट्री नसकिएको भन्दै त्यो म्याद बढाउनुपर्ने आवाज उठेको थियो । यद्यपि शुक्रबार नै बसेको केन्द्रीय समिति बैठकले समय नथप्ने निर्णय गरेको थियो ।

महराले हार्डकपीमा भरिसकेका र अनलाइनमा इन्ट्री गराइ नसकिएको विवरण केन्द्रीय कार्यालयमा पठाउन भनिएको छ । समयमै हार्डकपी भरेर पठाइएका विवरणलाई भने मान्यता दिने र पछिसम्म केन्द्रीय कार्यालयबाटै अनलाइनमा इन्ट्री गरिने महराको भनाइ छ ।

माओवादीले पुस ११-१३ गतेसम्म काठमाडौंमा राष्ट्रिय सम्मेलन गर्दैछ ।