युट्युबको ‘डिस्लाइक’ संख्या अब नदेखिने

काठमाडौं । भिडिओ सेयरिङ प्लेटफर्म- युट्युबले भिडिओको ‘डिस्लाइक’ संख्यालाई प्राइभेट बनाउने भएको छ । हाल युट्युबमा अपलोड गरेका सबै भिडिओको लाइक र डिस्लाइक सबै संख्या सार्वजनिक रूपमा नै देखिने गरेको छ ।

तर, गुगलको स्वामित्वमा रहेको युट्युबले डिस्लाइकको अप्सन नै नहटाउने तर संख्या भने प्राइभेट गर्ने घोषणा गरेको हो । प्रयोकर्ताले डिस्लाइक गर्दा गुगलको रिकम्मेन्डेसन एल्गोरिदमलाई जानकारी हुन्छ । त्यसैले डिस्लाइक नै गर्ने विकल्प भने नहटाउने भएको हो ।

युट्युबका अनुसार यो एक अध्ययनको नतिजापछि लिइएको निर्णय हो । त्यो अध्ययन गत वर्ष भएको थियो । डिस्लाइकको संख्या नदेखाएपछि कसैले नियोजित रूपमा लाइकभन्दा डिस्लाइक धेरै बनाउका लागि नियोजित रूपमा क्याम्पेनिङ गर्न पाउने छैनन् ।

युट्युबले गरेको अध्ययनबाट भिडिओमा भएको डिस्लाइकको संख्या नदेखाइएको भिडिओमा तुलनात्मकरूपमा अन्य भिडिओमा भन्दा कम डिस्लाइक आएको थियो । यसबाट नियोजित रूपमा हुने डिस्लाइक कम हुने युट्युबको विश्वास छ ।

यद्यपि, युट्युब स्टुडियोको ड्यासबोर्डमा गएर भने कन्टेन्ट क्रिएटरले डिस्लाइक संख्या हेर्न सक्नेछन् ।