हुम्लाका सबै पालिकामा एमालेको सर्वसम्मत नेतृत्व, महाधिवेशन प्रतिनिधि छान्न बैठक बस्दै
सुर्खेत । नेकपा एमाले हुम्लाले सबै सातवटा स्थानीय तहमा सर्वसम्मत नेतृत्व चयन गरेको छ ।
एमाले हुम्लाका अध्यक्ष दल रावलका अनुसार सबै पालिकाको वडा र पालिका अधिवेशन सम्पन्न भएको छ । आज महाधिवेशन प्रतिनिधि चयन गर्नका लागि जिल्ला कमिटिको वैठक बसिरहेको उनले जानकारी दिए ।
जिल्लाका सबै पालिकामा सर्वसम्मत नेतृत्व चयन भएको अध्यक्ष रावलले बताए । उनका अनुसार ताँजाकोट गाउँपालिका अध्यक्षमा नरदीप थापा, अदानचुली गाउँपालिकामा बुध भण्डारी, चंखेली गाउँपालिकामा टेकबहादुर शाही, सर्केगाड गाउँपालिकामा भीमबहादुर सिंह अध्यक्ष चयन भएका छन् ।
यस्तै, खार्पुनाथ गाउँपालिकामा प्रकाशबहादुर शाही, सिमीकोट गाउँपालिका चिन रावत र नाम्खा गाउँपालिका टोप छिरिङ तामाङ अध्यक्षमा चयन भएका छन् ।