हुम्लाको खार्पुनाथ स्वास्थ्यचौकीमा औषधी अभाव

हुम्ला । हुम्लाको खार्पुनाथ गाउँपालिका-१ स्थित लाली स्वास्थ्यचौकीमा औषधी अभाव हुँदा बिरामीलाई समस्या परेको छ । एक सातादेखि स्वास्थ्यचौकीमा औषधी सकिएपछि उपचारका लागि आएका वडा नम्बर १ को लागी, प्युस, गोक्पालगायत गाउँका बिरामी रित्तो हात फर्कन बाध्य छन् ।

सिजनल ज्वरोका कारण गाउँमा अधिकांश बालबालिका र वृद्धवृद्धा बिरामी परेकोमा औषधी अभावले समस्या भइरहेको स्थानीय विर्जन शाहीले बताए । उनले भने, ‘गाउँबाट बिरामी परेका नागरिकका लागि स्वास्थ्यचौकीमा उपचार तथा औषधी लिन पुग्दा स्वास्थ्यकर्मीले औषधी छैन भन्दै फिर्ता पठाउने गरेका छन् ।’

स्वास्थ्यचौकीमा दैनिक १५ देखि २० जनासम्म उपचारका लागि आउने गरेका छन् । केही दिनयता सिजनल फ्लुका बिरामी बढिरहेको स्वास्थ्यकर्मीले बताएका छन् ।