भरतमणिसँगको भेटमा के भने पूर्वयुवराज पारसले ?

काठमाडौं । कमेडी च्याम्पियन २ का विजेता भरतमणि पौडेलले पूर्वयुवराज पारस शाहसँग भेट गरेका छन् । दुवैबीच एक घण्टा कुराकानी भएको थियो ।

कमेडि च्याम्पियनमा भरतमणिले गरेको पारसको क्यारिकेचर धेरैले मन पराएका थिए ।

पौडेलले केही दिनअघि भेटघाट गरे पनि आज बिहानमात्र सामाजिक सञ्जालमा तस्बिर राखेका छन् । उनले पूर्वयुवराज शाह निकै रमाइलो भएको बताए ।

पारससँग शुक्रबार अपराह्न ५ बजेतिर शेर्पा मलस्थित ओपनियन रेस्टुरेन्टमा भेट भएको भरतमणिले बताए ।

भेट्नेबित्तिकै पूर्वयुवराज पारसले आफूलाई फन्नी फन्नी भनेको उनले भने । ‘साँझ ५ बजेदेखि एक घण्टा बस्यौं, उहाँले मेरो भिडिओ हेर्नुभएको रहेछ, एकदम रमाइलो लाग्यो भन्नुभयो । अनि आफ्नै स्टाइलमा उत्साह दिँदै भन्नुभयो- फन्नी फन्नी किप इन टच । मलाई त एकदम मन पर्‍यो, उहाँको सादगी जीवन देखेर’, भरतमणिले भने, ‘मानौं, वर्षौदेखि उहाँको र मेरो चिनजान छ झैं लाग्यो । दले दाइ (सुमन कोइराला) र म यताबाट थियौं भने उहाँ र मुनेन्द्र दाइ हुनुहुन्थ्यो । खाजा सँगै खाइयो । जे होस् त्यो भेट मेरा लागि ऐतिहासिक र रमाइलो थियो ।’