भारतमा राष्ट्रिय फिल्म अवार्ड वितरण : कंगना र मनोज सर्वोत्कृष्ट, रजनीकान्तलाई दादा साहेब फाल्खे

नयाँ दिल्ली । सोमबार भारतमा ६७ औं राष्ट्रिय फिल्म अवार्ड वितरण गरिएको छ । उपराष्ट्रपति वेंकैया नायडूले विजेता फिल्म र कलाकारलाई पुरस्कार हस्तान्तरण गरे । ‘मर्णिकर्णिका’ र पंगा फिल्मबाट अभिनेत्री कंगना रनावतले सर्बोत्कृष्ट अभिनेत्रीको पुरस्कार प्राप्त गरिन् । कंगनाको यो चौंथो राष्ट्रिय फिल्म अवार्ड हो । मनोज वाजपेयीले ‘भोंसले’ र धनुषको ‘असुरन’बाट सर्वोत्कृष्ट अभिनेताको अवार्ड प्राप्त गरे ।

कंगनाले अवार्ड पाएको तस्विर सामाजिक सञ्जालमा पोष्ट गर्दै भनेकी छिन् : आज म एकदमै उत्साहित भएकी छु । फिल्मको टिमलाई धन्यवाद दिन चाहन्छु । ’ कंगना अवार्ड सेरमनीमा गोल्डन सिल्क सारी र गोल्ड ज्वेलरीको लुक्समा पुगेकी थिइन् ।

कंगनाले २००८ मा फिल्म ‘फेसन’मा सहायक अभिनेत्रीको रुपमा पहिलो राष्ट्रिय पुरस्कार जितेकी थिइन् । २०१४ मा ‘रानी’ फिल्मको सर्वश्रेष्ठ अभिनेत्रीको रुपमा दोस्रो राष्ट्रिय पुरस्कार प्राप्त गरेकी थिइन् भने २०१५ मा कंगनाले ‘तनु वेड्स मनु’ मा बेस्ट एक्ट्रेस को पुरस्कार पाएकी थिइन् ।

आज भएको ६७ औं राष्ट्रिय फिल्म अवार्डमा नितेश तिवारीको निर्देशनमा रहेको फिल्म ‘छिछोरे’ उत्कृष्ट फिल्म घोषित भएको छ । फिल्ममा सुशान्त सिंह राजपूत, श्रद्धा कपूर अभिनित छन् भने मनोज बाजपेयीलाई ‘भोंसले’ र धनुषलाई ‘असुरन’का लागि उत्कृष्ट अभिनेताको अवार्ड दिइएको छ ।

कोरोना महामारीका कारण अवार्ड आयोजना हुन एक वर्ष ढिलाई हुन पुगेको हो । यो अवार्ड केन्द्र सरकारको सूचना तथा प्रसारण मन्त्रालय, केन्द्रीय सरकार अन्तर्गत आउने चलचित्र महोत्सव निर्देशनालयले अवार्ड दिने गरेको छ । यो पुरस्कार राष्ट्रपतिले वितरण गर्ने गरिएको थियो । ६६ औँ पुरस्कार उपराष्ट्रपति वेंकैया नायडूले दिएका थिए भने राष्ट्रपति रामनाथ कोविन्दले विजेताहरू हाई टीको आयोजना गरेका थिए।

सुपरस्टार रजनीकान्त ‘दादासाहेब फाल्के’ अवार्डबाट सम्मानित भएका छन् । सम्मान ग्रहण गर्दै उनले दर्शक तथा शुभेच्छुकलाई धन्यवाद दिए । कार्यक्रममा सबैले रजनीकान्तलाई स्ट्यान्डिङ ओभेशन समेत दिए।