दोहोरी च्याम्पियनको फाइनलमा प्रकाश-मीना र बालचन्द्र-शोभा टीमको प्रतिस्पर्धा हुने

काठमाडौं । टेलिभिजन गायन रियालिटी सो दोहोरी च्याम्पियनको ग्रान्ड फिनाली आगामी शनिबार तालनगरी पोखरामा हुने भएको छ । त्यहाँको बाराही घाटमा सोको ग्रान्डी फिनाली हुने आयोजकले जनाएको छ ।

उपाधि जित्न प्रकाश पराजुली र मीना बुढाथोकीको टीमसँग बालचन्द्र बराल र शोभा कार्कीको टीमबीच गायन भीडन्त हुनेछ । पराजुली र मीनाको टीम यसअगाडि नै फाइनलमा पुगेको थियो भने बालचन्द्र र शोभाको टीम राजेन्द्र पाठक र मीना नेपालको टीमलाई हराउँदै उपाधिका फाइनलमा पुगेको हो ।

तृतिय स्थानका लागि सविन आचार्य र रीता राउतको टीमसँग राजेन्द्र पाठक र मीना नेपाल टीमको प्रतिस्पर्धा हुनेछ । दर्शकको मतका आधारमा विजेता छानिने र गत शनिबार साँझदेखि भोटिङ राउण्ड खुला भएको जनाइएको छ । नेपाल टेलिभिजनको एपमार्फत भोटिङ गर्न सकिने निर्णायकमध्येका एक रमेश बिजीले जानकारी दिए ।

डिजिटल अडिसनबाट छानिएका ३५ वटा टीमको फिजिकल अडिसनमार्फत उत्कृष्ट २४ छानिएको थियो ।

सोमा प्रथम हुने टीमले २० लाख रुपैयाँ र १ करोड बराबरको जीवन बीमा प्राप्त गर्ने भएको छ । दोस्रो हुने टीमले १० लाख रुपैयाँसँगै ५० लाख बराबरको जीवन बीमा प्राप्त गर्नेछ । तृतिय हुनेले ३ लाख र सान्त्वना हुने टीमले २ लाख रुपैयाँ प्राप्त गर्ने आयोजकले जनाएको छ ।

निर्णायकमा प्रजापति पराजुली, सीता थापा, गीतकार रमेश बि.जी र चन्द्र शर्मा छन् । गायक बद्री पंगेनी र गायिका प्रीति आले संचालकको भूमिकामा छन् । यो गायन सो एनटीभीमा प्रत्येक शनिबार राती ८ः५० बजे प्रसारण हुँदै आएको छ।