जब मनाङमा अमिताभ बच्चन भेटिए !

काठमाडौं । अहिले मनाङमा बलिउड फिल्म उचाइ छायांकन चलिरहेको छ । लुक्ला र नाम्चेपछि मनाङमा निर्देशक सुरज वर्जत्यले फिल्म सुटिङ गरिरहेका छन् ।

अनुपम खेर, बोमन इरानी, परिणिती चोपडासहितका केही नेपाली कलाकार अहिले मनाङको चिसो तापक्रममा फिल्म छायांकन गरिरहेका छन् । प्रमुख भूमिकामा रहेका अमिताभ बच्चन नेपालमा नआएपनि उनको पार्टको छायांकन भैरहेको छ ।

भारतबाटै ल्याइएका अभिनेता बच्चनको भूमिका एकजना डमी कलाकारले गरिरहेका छन् । अमिताभजस्तै दुरुस्तै हुलिया रहेका ती कलाकारको लङ र ब्याकसट् नेपालमा खिच्ने काम भैरहेको छ ।

अल्टिच्युड एयरका पाइलट विवेकले अमिताभको डमी एक्टरको तस्बिर सामाजिक संजालमा सेयर गरेका छन् । यसअघि निमोनियाका बिरामी समेत रहेका अमिताभलाई चिकित्सकले चिसो ठाउँमा नजान सुझाएपनि उनी नेपाल आएका थिएनन् ।

सोही कारण डमी कलाकार नेपाल ल्याइएको हो । फिल्मको नेपाल व्यवस्थापन हेरिरहेको कम्पनी थ्री हिवलर्सका अनुसार अझै एकसाता फिल्म छायांकन मनाङमा हुनेछ । त्यसपछि मुम्बइ फर्कने कार्यक्रम छ ।

मित्रताको कथा प्रस्तुत गर्ने फिल्मले तीन वृद्ध साथीहरु नेपालको हिमाली भूगोलको पदयात्रामा निस्किएको कथा भन्छ ।