महाधिवेशन हुन नदिने चलखेलमा देउवा नै लागेको सिंहको आरोप (भिडिओ)

जनकपुरधाम । नेपाली कांग्रेसका नेता प्रकाशमान सिंहले सभापति शेरबहादुर देउवा नै समयमा महाधिवेशन हुन नदिने चलखेलमा लागेको आरोप लगाएका छन् ।

आइतबार जनकपुरधाम विमानस्थलमा सञ्चारकर्मीसँग संक्षिप्त कुराकानी गर्दै उनले यस्तो आरोप लगाए । उनले भने, ‘महाधिवेशन तोकिएको समयमा हुनुपर्छ । के गाह्रो छ ? निर्वाचन समिति त तयार छ । पार्टी सभापति ज्युले समितिमाथि समिति गठन गरेर बेकारमा आलटाल गरिरहनु भएको छ ।’

लामो समयदेखि एउटै व्यक्तिले नेतृत्व गर्दा पार्टीमा बेतिथि देखिएको भन्दै नेता सिंहले समयमै महाधिवेशन हुनुपर्नेमा जोड दिए । क्रियाशिल सदस्यता वितरणमा समेत धांधलीको आरोप लगाउदै उनले पार्टी नेतृत्वको आलोचना गरे ।

उनले उहिलेदेखि पार्टीको नेतृत्व गरिरहेको वर्गलाई तोड्न सबैले वुद्धि पुर्‍याउनुपर्ने बताए । पार्टीमा देखिएको बेतिथि हटाउन नयाँ पुस्ता एकजुट हुनुपर्ने भन्दै पार्टीमा पुस्तान्तरणका लागि सभापति पदमा उम्मेदवारी दिने बताए ।

१४ औं महाधिवेशनमा नयाँ अनुहारलाई मौका दिनुपर्ने नेता सिंहको भनाइ छ । उनले भने, ‘नयाँ अनुहारलाई अवसर दिनुपर्छ भनेर मैले अभियान नै चलाएको छु । यो अभियानलाई साथीहरूले सघाइराख्नु भएको छ । १४ औं महाधिवेशनले नेतृत्व फेरिन्छ भन्ने विश्वास छ ।’