सर्वोच्चको गुटबन्दी क्लाइमेक्समा, इजलास ‘बंक’ गर्ने तयारीमा केही न्यायाधीश

काठमाडौं । सर्वोच्च अदालतका केही न्यायाधीशले प्रधानन्यायाधीश चोलेन्द्र शमसेर जबराविरुद्ध चलाइरहेको गुटबन्दी क्लाइमेक्समा पुगेको छ ।

अदालत बाहिरबाट भइरहेको सडक र मिडिया ट्रायललाई बल पुर्‍याउने उद्देश्यले आज केही न्यायाधीशले इजलास बहिस्कार गर्ने भएका छन् ।

वरिष्ठतम न्यायाधीश दीपक कार्की, प्रकाशमान सिंह राउत समूहबाट प्रधानन्यायाधीशले तोकेको इजलास बहिष्कार गर्न लागिएको सर्वोच्च स्रोतले जनाएको छ ।

सर्वोच्च अदालतमा पछिल्लो समय वरिष्ठतम न्यायाधीशकै नेतृत्वमा प्रधानन्यायाधीशविरुद्ध गुटबन्दी भइरहेको छ ।

प्रधानन्यायाधीशलाई राजीनामा वा महाअभियोग लगाएर हटाउने अभियान सत्ता गठबन्धन निकट केही कानून व्यवसायीले चलाइरहेका बेला त्यसलाई साथ दिन न्यायाधीशहरुले इजलास बहिष्कार गर्न लागेका हुन् ।

नेपाल बार एशोसिएसनबाट राजीनामा मगाउने एजेण्डा तत्काल पारित हुन नसकेपछि न्यायाधीशहरु आफैं विद्रोहमा उत्रिएका हुन् ।

यसैबीच नेपाल बार एशोसियसनले प्रधान न्यायाधीशसँग भेट गरेको छ । शुक्रवारको बैठकको निर्णय अनुसार समग्र विषयमा छलफल गर्न आफूहरु प्रधान न्यायाधीशसँग वार्ताम रहेको बारका कोषाध्यक्ष रुद्र पोखरेलले बताए ।

बारले आफ्नो जिम्मेवारी पूरा नगर्ने दिपक कार्की,प्रकाशमान सिंह राउत लगायतका न्यायाधीशप्रति समेत असन्तुष्टी जनाएको छ ।