माओवादीमा फर्किने हल्लाबारे प्रभु साहले भने- अस्थिरताका वाहक प्रचण्डको नेतृत्व स्वीकार्य छैन

काठमाडौं । पूर्वमन्त्री तथा नेकपा एमालेका नेता प्रभु साहले आफू माओवादीमा फर्किन लागेको भनी चलाइएका हल्ला खारेज गर्दै प्रचण्डको नेतृत्वमा कदापी नजाने प्रष्ट पारेका छन् ।

साहले कपोकल्पित र भ्रामक प्रचारबाजीको खण्डन गर्ने भन्दै जारी गरेको विज्ञप्तिमा जनयुद्ध र हजारौं शहीदको अपमान गरेर खिचडी संसदीय व्यवस्थामा कुर्सीको खेल चलाएका प्रचण्डसँग कुनै हालतमा एकता हुन नसक्ने बताएका छन् ।

शाहले भनेका छन्, ‘प्रचण्डकै कारण आज हजारौ योग्य नेपाली विदेश पलायन हुन बाध्य छ । आफ्नो व्यक्तिगत स्वार्थका कारण माओवादी आन्दोलनलाई टुक्रा टुक्रा गरी सिंगै देशलाई नै अस्थिरताको खाडलमा धकेल्ने प्रचण्डको नेतृत्वमा कोही पनि सच्चा माओवादी र क्रान्तिकारीहरू एकताबद्ध हुन सक्दैन ।

आफू क्रान्तिकारीहरूको ध्रुवीकरणको पक्षमा रहेको भन्दै प्रचण्डलाई असफल र अविश्वसनीय व्यक्ति भनेका छन् । साह पछिल्लो समय एमालेमा पनि सक्रिय छैनन् । उनको ८ बुँदे माग एमालेले सम्बोधन गरेमात्र पार्टीमा क्रियाशील हुने बताएका छन् ।

पछिल्लो पटकको वार्ता सकारात्मक भएपछि उनी पार्टी काममा फर्किने बताइएको छ । नेकपा एकताको निरन्तरताको रूपमा एमालेलाई अघि बढाउनुपर्ने उनको माग छ ।