‘डाँडाको बरपिपल’ फ्लप भए पनि शोभितकै निर्देशनमा बुढासुब्बाले नयाँ फिल्म बनाउने

काठमाडौं । दसैँमा रिलिज गरिएको शोभित बस्नेत निर्देशित चलचित्र ‘डाँडाको बरपिपल’ नराम्रोसँग फ्लप भयो । लामो समयपछि खुलेका हलहरुमा यस चलचित्रले दर्शक फर्काउने अपेक्षा सार्थक भएन ।

‘डाँडाको बरपिपल’ को निर्माण बुढासुब्बा डिजिटलले गरेको थियो । यो चलचित्र मुलत: ओटीटी प्लेटफर्ममा चलाउनका लागि निर्माण गरिएकाले हलमा नचल्दा पनि निर्माण पक्ष हतोत्साही नभएको बुझिएको छ । ओटीटीबाटै लगानी रिकभर गर्ने लक्ष्य राखेको कम्पनीले बस्नेतकै निर्देशनमा अर्को चलचित्र निर्माण गर्ने भएको छ । चलचित्रको नाम भने फाइनल भइसकेको छैन ।

निर्देशक बस्नेतले चलचित्रको कथावस्तुमा आफूले काम गरिरहेको बताए । अहिले कथावस्तुमा काम भइरहेको र स्टारकास्ट टुंगो लाग्न बाँकी रहेको उनले नेपाल प्रेसलाई जानकारी दिए । यद्यपि, मुख्य जोडीका रूपमा सलोन बस्नेत र रुबिना थापालाई नै लिइने बस्नेतले जानकारी दिए ।

‘उनीहरूसँग सम्झौता भइसकेको छैन, तर फाइनल गरिसकेको छु,’ उनले भने । बाँकी कलाकारहरु छनोट गरेर तिहारपछि फ्लोरमा जाने उनले जानकारी दिए ।