ट्रम्पको आफ्नै सामाजिक संजाल ट्रुथ घोषणा : सन् २०२२ को सुरुआतदेखि लन्च हुने

वासिङ्टन । पूर्वअमेरिकी राष्ट्रपति डोनाल्ड ट्रम्पले आफ्नै लगानीमा नयाँ सामाजिक संजाल ‘ट्रुथ’ (सत्य) लन्च गर्ने घोषणा गरेका छन् ।

ठूला सामाजिक संजालको मनपरीलाई चुनौति दिन आफूले नयाँ सामाजिक संजाल ल्याउन लागेको ट्रम्पले जनाएका छन् । फेसबुक, ट्वीटरजस्ता संजालले अमेरिकी जनताको आवाजलाई दबाएको आरोप पनि उनको छ ।

उनले नेतृत्व गर्ने ट्रम्प मिडिया एन्ड टेक्नोलोजी ग्रुपले भिडियो अन डिमान्ड सेवा पनि लन्च गर्ने तयारी गरेको छ । गत जनवरीमा उनका समर्थकले अमेरिकी संसद भवनमा तोडफोड गरेपछि फेसबुक र ट्वीटरले ट्रम्पलाई रोक लगाएका छन् ।

त्यसपछि ट्रम्पले आफ्नै सामाजिक संजाल ल्याउने घोषणा गरेका थिए । यसवर्षको सुरुआतमा डोनाल्ड जे ट्रम्पको नाममा उनले ब्लग संचालनमा ल्याएका थिए । तर, एक महीना नबित्दै यो ब्लग बन्द भयो ।

ट्रम्पको कम्पनीले जारी गरेको विज्ञप्तिअनुसार ट्रुथ नामक उक्त सामाजिक संजाल केही अतिथिको लागि आगामी महीना प्रयोगमा आउनेछ भने सन् २०२२ को सुरुआती तीन महीनामा अमेरिकी प्रयोगकर्तामाझ संचालनमा आउने भएको छ ।

‘हामी यस्तो विश्वमा बस्छौं जहाँ ट्वीटरमा तालिबानको बृहत उपस्थिती छ तर, अहिलेसम्म अमेरिकी लोकप्रिय राष्ट्रपतिलाई मौन राखिएको छ’ ट्रम्पले लेखेका छन् ।