एकल महिला समूह (डब्लूएचआर) का संस्थापक अध्यक्ष लिली थापालाई मातृशोक

काठमाडौं । मानव अधिकारको लागि महिला, एकल महिला समूह (डब्लूएचआर) का संस्थापक अध्यक्ष लिली थापालाई मातृशोक परेको छ ।

केही समयदेखि विभिन्न रोगबाट अस्वस्थ थापाकी आमा नरेन्द्रकुमारी बस्न्यातको हिजो असोज ३१ गते उपचारका क्रममा अस्पतालमा निधन भएको र हिजै पशुपति आर्यघाटमा दाहसंस्कार गरिएको उनको पारिवारिक स्रोतले जनाएको छ ।

बस्न्यातले युवा अवस्थामै विधवा हुन पुगेकी छोरी लिली थापालाई सामाजिक कुरीतिविरुद्ध लड्न ढाडस दिँदै उनी जस्ता हजारौं एकल महिलालाई एकीकृत गर्न सहयोग गरेकी थिइन् ।

उनकै सहयोगका कारण लिलीको नेतृत्वमा डब्लूएचआर जन्मिएपछी श्रीमान्को मृत्युलाई आफ्नो भाग्यको खेल सम्झेर निरस जीवन बाचिरहेका देशैभरका एकल महिलाहरू एकाकार भई आफ्नो हक अधिकारका लागि लामवद्व भएका थिए ।

डब्लूएचआरकी संस्थापक सदस्यसमेत रहेकी बस्न्यातका श्रीमान् नेपाली सेनाका जर्नेल हुमानसिंह बस्न्यातको करिब दुई दशक अघि नै निधन भइसकेको पनि परिवारले जनाएको छ ।