अदालतको आदेशले कर्णालीमा चुनाव जितेका कांग्रेस प्रतिनिधिको पद धरापमा

सुर्खेत । शिक्षक, प्राध्यापक तथा कर्मचारीलाई तत्काल राजनीतिक कार्यमा संलग्न नगर्न नगराउन पाटन उच्च अदालतको अल्पकालीन अन्तरिम आदेशले कांग्रेसको जारी अधिवेशनमा कर्णालीमा चुनिएका कर्मचारी र शिक्षकमा तरंग ल्याएको छ ।

शिक्षक र कर्मचारीलाई तत्काल महाधिवेशन प्रतिनिधिलगायतका कार्यकारी पदमा नबस्न आएको आदेशले दैलेख घर भइ सुर्खेतमा कार्यरत स्वास्थ्यकर्मी राजेश बुढाको पद पनि धरापमा परेको छ ।

शिक्षक संघमा आआद्ध हुम्लाको बालमन्दिर मााध्यमिक विद्यालय सिमिकोटमा कार्यरत शिक्षिका मधु शाहीको पनि पद जोखिममा परेको छ । सीता माध्यमिक विद्यालयका प्रधानाध्यापक जुनराज हमाल, उषा रोकाय पनि महाधिवेशन प्रतिनिधिका रूपमा चुनिएका छन् ।

सल्यानमा पनि शिक्षक कर्मचारीहरू चुनावमा लडेका छन् । जिल्ला सचिवमा डिल्लिप्रसाद जैसी र शिक्षक एकराज बुढाथोकीले उम्मेदवारी दिएका छन् । क्षेत्रीय सभापतिमा शिक्षक वीरबहादुर सेजुवाललगायतले पनि उम्मेदवारी दिएको कांग्रेस सल्यानले बताएको छ ।

यस्तै, रुकुमपश्चिमलगायतका जिल्लामा पनि धेरै शिक्षक कर्मचारी कांग्रेसको पदमा आउन लागेको बताइएको छ ।

जुम्लामा पनि वडाबाट क्षेत्रीय प्रतिनिधिका रूपमा तीनजना शिक्षक आएका छन् । जनक कामी, गजबहादुर शाही र काले शाही शिक्षक हुन् ।

त्यस्तै कालीकोटमा पनि शिक्षक कांग्रेस महाधिवेशन प्रतिनिधि छनोट भएका छन् । शिक्षक मानबहादुर रोकायासहित यहाँ १५ जना बढी शिक्षक वडा प्रतिनिधि भइसकेका छन् ।

कर्णालीका अधिकांश जिल्लाबाट शिक्षक कर्मचारी वडा प्रतिनिधि बनेर आएका छन् । कर्णालीको सुर्खेत र डोल्पामा भने सदस्यता विवादका कारण अधिवेशन रोकिएको छ ।