डेढ दशकपछि काठमाडौं महानगरमा कांग्रेसको चुनावी रौनक (भिडिओसहित)

काठमाडौं । नेपाली कांग्रेसको १४ औं महाधिवेशनअन्तर्गत काठमाडौं महानगर कार्यसमिति चयनका लागि अहिले निर्वाचन भइरहेको छ ।

कांग्रेसको काठमाडौं महानगर समितिको अधिवेशन नभएको १५ वर्ष पुगिसकेको छ । ११औं महाधिवेशनबाट निर्वाचित महानगर सभापति देवरत्न डंगोलको कार्यकाल सकिएपछि बाह्रौं र तेह्रौं महाधिवेशनका बेला काठमाडौं महानगरको अधिवेशन भएको थिएन ।

राष्ट्रिय सभागृहमा जारी निर्वाचनबाट १ सभापति, २ उपसभापति, २ सचिव र २ सह सचिवसहित कार्यसमिति चयन हुनेछ । नेतृत्वका लागि संस्थापन पक्षबाट प्रगतिमान रञ्जित र संस्थापनइतर समूहबाट नीलकाजी शाक्य चुनावी मैदानमा रहेका छन् ।

रञ्जितलाई सभापति शेरबहादुर देउवासहित नेताहरू ध्यानगोविन्द रञ्जित, भीमसेनदास प्रधान, तीर्थराम डंगोललगायतको समर्थन रहेको छ । शाक्यलाई वरिष्ठ नेता रामचन्द्र पौडेल, पूर्व महामन्त्री प्रकाशमान सिंह, केन्द्रीय सदस्य गगन थापालगायतको समर्थन छ ।

अधिवेशन शनिबार उद्घाटन भएपनि आज मतदान भइरहेको हो । एक बजेसम्म मतदान हुने र लगत्तै मतगणा सुरु गरिने निर्वाचन समितिले जनाएको छ ।

तस्बिरहरू : सरोज बैजु ।