अर्जुनरसिंह केसीले भने- साझा उम्मेदवार नभए म पनि सभापतिमा भिड्छु

चितवन । नेपाली कांग्रेसका नेता अर्जुनरसिंह केसीले सुधारवादी पक्षहरुबीच समझदारी नबने आफूले पनि सभापति पदमा उम्मेदवारी दिने बताएका छन् ।

नेपाल प्रेस युनियन चितवनले भरतपुरमा गरेको पत्रकार सम्मेलनमा बोल्दै नेता केसीले भने, ‘प्रत्येक व्यक्ति महत्वकांक्षा लिएर बस्ने हो भने कसैको पछि लाग्ने कुरा हुँदैन, म पनि सभापतिको उम्मेदवार हो ।’

उनले पार्टीलाई संस्थागत सुदृढीकरण गर्न समझदारी भए जो सभापति बनेपनि सहयोग गर्न तयार रहेको बताए । ‘नेता होइन, नीति प्रधान बनाउँ, व्यक्ति होइन विचार प्रधान बनाउँ, यो संघर्षको क्रममा जो इच्छुक हुनुहुन्छ । सहमति गरेर जो भएपनि होऔं, एक बनौँ’, उनले भने, ‘एक हुन सकेनौँ भने सभापतिको उम्मेदवार म पनि हो ।’

उनले आफू पार्टीभित्रको सुधारवादी पक्षधर भएकाले स्वार्थविहीन संकल्प गरेर साझा उम्मेदवार बनाउन लागि परेको जिकिर गरे ।