भलिबलमा एपीएफ र न्यू डायमन्डको विजयी सुरूआत

काठमाडौं । एपीएफ क्लब र न्यू डायमन्ड स्पोर्टस क्लबले छैटौं संस्करणको एनभीए राष्ट्रिय महिला तथा पुरुष क्लब भलिबल च्याम्पियनसिपको महिलातर्फ विजयी सुरुआत गरेका छन् ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा मंगलबारदेखि सुरू महिला तर्फको पहिलो खेलमा एपीएफले ढोरपाटन स्पोर्टस क्लबलाई ३-० को सोझो सेटमा हराएको हो । पहिलो सेटमा २५-११ ले अग्रता लिएको एपीएफले ढोरपाटनविरूद्ध दोस्रो र तेस्रो सेटमा २५-७, २५-६ को सहज जित निकाल्यो ।

खोस्रो खेलमा न्यू डायमन्डले एभरेष्ट भलिबल ट्रेनिङ क्लबलाई ३-० को सोझो सेटले पराजित गरेको छ । प्रतिस्पर्धामा २५-६, २५-५, २५-१३ को नतिजा आएको थियो ।