त्रिशुलीमा बेपत्ताको ड्रोनमार्फत खोजी हुँदै

चितवन । कार दुर्घटनामा परी त्रिशुली नदीमा बेपत्ता भएकाको खोजी गर्न ड्रोनसहितको टोली परिचालन हुने भएको भएको छ । काठमाडौंबाट पोखरा जाँदै गरेको ग २ च ४९१८ नम्बरको कार गएराति अनियन्त्रित भइ नदीमा खसेको थियो ।

दुर्घटनामा परी ३ जना बेपत्ता छन् । कास्कीको पोखरा महानगरपालिका–१७ का प्रेमबहादुर भुजेल, लेखबहादुर भुजेल र ३६ वर्षीया ईश्वरी भुजेल बेपत्ता छन् ।

पृथ्वीराजमार्गको मुग्लिन–नौविसे खण्डअन्तरगत इच्छाकामना–५ नाग्दी खोला नजिकै दुर्घटना भएको थियो । हालसम्म बेपत्ता फेला परेका छैनन् ।

सशस्त्र प्रहरी बलको गोताखोर टोलीले खाजी गर्दा समेत बेपत्ता नभेटिएपछि प्रहरीले प्रविधिको प्रयोग गर्न लागेको हो । चितवन प्रहरीका प्रवक्ता डिएसपी सूर्यबहादुर थापाले ड्रोनमार्फत बेपत्ताको खोजी गर्न लागिएको बताए ।

नेपाल प्रहरीको प्रहरी प्रधान कार्यालयबाट ड्रोनसहितको टोली काठमाडौंबाट आउँदै छ । कार दुर्घटनामा परी घाइते अवस्थामा कास्कीको पोखरा महानगरपालिका–१७ का रुद्रलाल सुवेदीको उद्वार गरेर पुरानो मेडिकल कलेजमा उपचार भइरहेको छ ।

कार अनियन्त्रित हुँदा सडकबाट अन्दाजी १०० मिटर तल त्रिशूलीमा खोलामा खसेको थियो ।