करिब ४० लाख मूल्य बराबरको चाँदीसहित सोनार पक्राउ

जनकपुरधाम । रौतहट प्रहरीले ३९ लाखभन्दा बढी रुपैयाँको ४० किलोग्राम चाँदीसहित एक युवकलाई पक्राउ गरेको छ ।

पक्राउ पर्नेमा सर्लाहीको मलंगवा नगरपालिका २२ का ३५ वर्षीय विद्यानन्द साह सोनार रहेका छन् । गौर नगरपालिका– ४ स्थित बसपार्कबाट साहलाई चाँदीसहित पक्राउ गरेको प्रहरीले जनाएको छ ।

शंका लागेर चेकजाँच गर्दा सोनारले बोकेको २ झोलाबाट ४० किलोग्राम चाँदी बरामद भएको रौतहटका प्रहरी प्रवक्ता डिएसपी नारायण प्रसाद चिमोरियाले जानकारी दिए ।

उनका अनुसार बरामद चाँदी ३९ लाख ४४ हजार मूल्य बराबरको रहेको छ । पक्राउ परेका सोनारलाई चाँदीसहित आवश्यक कारबाहीका लागि राजश्व अनुसन्धान कार्यालय पथलैया पठाइएको छ ।