सुडानमा ‘कू’को असफल प्रयास

खार्तुम । मंगलबार बिहानै सुडानमा सत्ताविप्लव (कू) को असफल प्रयास भएको र योजनाकारको खुलासा नभएको अलजजिराले जनाएको छ ।

राज्य नियन्त्रित मिडियाले भनेको छ, ‘कूको असफल प्रयास भएको छ । नागरिकले यसलाई प्रतिकार गर्नुपर्छ ।’

त्यहाँको सर्वोच्च शाषकीय अंग रुलिङ काउन्सिलका एक सदस्यले रोयटर्सलाई बताएअनुसार अहिले परिस्थिती नियन्त्रणमा आइसकेको छ ।

कूको प्रयासमा सहभागिलाई सोधपुछ सुरु गरिने र यसबारे चाँडै सेनाले वक्तव्य जारी गर्ने सैनिक प्रवक्ता मोहम्मद अल फाकी सुलेमानले बताएका छन् ।

सुलेमानले यसअघि पनि नागरिकलाई देशको रक्षा गर्न आग्रह गरेका थिए । उनले फेसबुकमा लेखेका छन्, ‘देशको रक्षा र संक्रमणकालिन अवस्थाको सुरक्षा गर्न म आग्रह गर्छु ।’

नाम उल्लेख गर्ने सर्तमा स्रोतले समाचार संस्था एएफपीलाई बताएअनुसार राजधानी खार्तुमदेखि नाइल नदी वारपार तथा राज्य नियन्त्रित रेडियो स्टेसनलाई नियन्त्रणको प्रयास भएको थियो ।

सरकारले बताएअनुसार वादी सिदना र ओमडरम्यान क्षेत्रबाट सशष्त्र गाडीमा चढेर आएका अधिकृतहरुले सैन्य कूको प्रयास गरेका हुनसक्छन् ।