ओलीको दावी- प्रचण्डले माधव गुट लिएर गए, माओवादीको मूल हिस्सा एमालेसँगको एकतामै छ (भिडियो)

काठमाडौं । नेकपा एमालेका अध्यक्ष केपी शर्मा ओलीले प्रचण्डले माधव नेपाल गुटमात्र आफूसँग लिएर गएको भन्दै आफूले नेकपा एकतालाई निरन्तरता दिएको बताएका छन् ।

झापाको बिर्तामोडमा आयोजित जिल्ला कार्यकर्ता भेलालाई सम्बोधन गर्दै कानूनी र भावनात्मकरूपमा एमाले विगतकै पार्टी भए पनि संगठन र राजनीतिको हिसाबले नेकपाकै निरन्तरता रहेको ओलीले बताए ।

ओलीले भने, ‘फागुन २३ को फैसलाले एमाले र माओवादी आ-आफ्नो पार्टी भएका होइनन् । एकीकृत पार्टी यथावत छ । प्रचण्डले माधव नेपाल गुट र आफ्नो गुट लिएर हिँडेका हुन् । आमरूपमा एमाले र माओवादी यही पार्टीमा छन् ।’

ओलीले विभिन्न तहका माओवादी नेताहरू अहिले पनि एमालेमै रहेको भन्दै प्रचण्ड गुटमात्र बाहिरिएको दावी गरे । उनले झापाका केही माओवादी नेताहरुलाई एमालेमा प्रवेश गराउँदै प्रचण्डको भ्रमबाट मुक्त भएर एमालेमा एकताबद्ध हुन आह्वान गरे ।’

ओलीले भने, ‘प्रचण्डले लिएर गएको माधव गुटमात्र हो,अरु सबै साथी हामीसँगै छन् । एमाले कानूनी र ऐतिहासिक कुरा हो । प्रचण्डले पचण्ड गुट लिएर गएका हुन् । माओवादी केन्द्र लिएर गएको भनेको कानूनी रुपमा मात्र हो,राजनीतिकरूपमा होइन ।’