बरदारले तालिबान सरकारको नेतृत्व गर्ने, आजै सरकार गठनको घोषणा गर्ने तयारी

रोयटर्स/काबुल । तालिबान सह-संस्थापक मुल्लाह बरदारले नयाँ अफगानिस्तान सरकारको नेतृत्व गर्ने भएका छन् । रोयटर्सका अनुसार सम्भवतः आजै सरकार गठनको घोषणा हुनसक्छ ।

काबुलको उत्तरमा रहेको प्रान्त पाञ्जसिरलाई कब्जामा लिएपछि तालिबानले सरकारको घोषणा गर्न लागेको हो । नयाँ सरकारको प्राथमिकता २ लाख ४० हजारको ज्यान जाने गरि भएको द्वन्द्वका कारण ध्वस्त अफगानिस्तानको अर्थतन्त्र उकास्नु हुनेछ ।

बरदार नेतृत्वको सरकारमा दिवंगत तालिबान सहसंस्थापक मुल्लाह ओमारका छोरा मुल्लाह मोहम्मद याकुब र सेर मोहम्मद अब्बास स्तानेज्कीले पनि उच्च पद पाउने जनाइएको छ ।

‘सबै तालिबानका उच्च नेताहरु सरकारको घोषणाको अन्तिम तयारीका लागि राजधानी काबुल आइपुगेका छन्’ नाम उल्लेख नगर्ने सर्तमा तालिबान अधिकारीले रोयटर्सलाई भने ।

तालिबान सर्वोच्च नेता हेबितुल्लाह अखुन्जादा चाहिँ इस्लामिक परम्पराअनुसारको धार्मिक र सुशासनको गतिविधिमा सक्रिय हुनेछन् । गत अगस्ट १५ मा काबुललाई कब्जामा लिएको तालिबानले पञ्जिसिरमा भने विरोधी लडाकुसँग चुनौति खेप्नुपरेको जनाइएको छ ।