कर्णाली एमालेको पुरानो संरचना क्रियाशील, एक ढिक्कासाथ जनतामाझ जाने

सुर्खेत । नेकपा एमाले कर्णाली प्रदेश कमिटी २०७५ जेठ २ को अवस्थामा फर्किएको छ । आज पार्टी कार्यालयमा अनौपचारिक छलफल गर्दै पार्टीलाई एकढिक्काका साथ लैजाने निर्णय गरेको हो ।

आजको छलफलमा नेकपा एमालेका उपाध्यक्ष एवम् कर्णाली प्रदेश संयोजक युवराज ज्ञवाली, सहसंयोजक यामलाल कंडेल, केन्द्रीय कमिटी सदस्य एवम प्रचार विभाग उपप्रमुख विष्णु रिजाल, दैलेख इन्चार्ज लक्ष्मीप्रसाद पोखरेल, केन्द्रीय सदस्य राजबहादुर बुढा, एमाले कर्णाली प्रदेश अध्यक्ष गोरख बोगटी, गुलाबजंग शाह, गोविन्दविक्रम शाह लगायत सहभागी थिए ।

बैठकमा पार्टीका एजेण्डा लिएर जनतामाझ जाने, जिल्ला भेलाहरू गर्ने, पार्टीको महाधिवेशनका बारेमा आवश्यक निर्णय गरेर कार्यान्वयनमा जानेलगायतका विषयमा छलफल भएको थियो । सबै १० जिल्लामा विभिन्न मितिमा भेलाहरूको आयोजना गरिएकोले सबैलाई उपस्थित हुन र खट्न आव्हान गरिएको नेता रिजालले बताए ।