च्यासलले फुटबल एकेडेमी सञ्चालन गर्ने

काठमाडौं । शहीद स्मारक ‘ए’ डिभिजन लिगको टोली- च्यासल युथ क्लबले युवा खेलाडी विकास र उथानका लागि एकेडेमी सञ्चालन गर्ने भएको छ । च्यासल युथ क्लब, अखिल नेपाल फुटबल संघ (एन्फा) र कीर्तिपुर स्थित पुष्पसदन बोर्डिङ हाई स्कुलबीचको सहकर्यमा फुटबल एकेडेमी स्थापना हुने क्लबले विज्ञप्तिमार्फत जानकारी दिएको छ ।

एकेडेमी सञ्चालनका लागि च्यासल युथ क्लबका अध्यक्ष रमेश ब्यञ्जनकार र पुष्पसदन बोर्डिङ हाई स्कुलको तर्फबाट प्रिन्सिपल राम धन राईद्वारा सम्झौता पत्रमा हस्ताक्षर भएको थियो । एन्फाका उपाध्यक्ष तथा ग्रासरुट तथा युवा संयोजक उपेन्द्रमान सिंहले एन्फाकोतर्फबाट सम्झौतामा हस्ताक्षर गरे ।

एकेडेमी च्यासल-पुष्पसदन युथ फुटबल एकेडेमीको नामबाट सञ्चालन हुने क्लबले बताएको छ । क्लबका ७ खेलाडी र स्कुलका ७ जना गरी जम्मा १४ जना खेलाडीहरू पहिलो वर्ष एकेडेमीमा सामेल हुनेछन् भने क्लबले दोस्रो वर्षमा अन्य सात जना खेलाडीहरू थपेर कूल २१ खेलाडीलाई प्रशिक्षण दिने क्लबको तयारी छ ।