भूतपूर्व गोर्खा सैनिकको आन्दोलनबारे रावलद्वारा सरकारको ध्यानाकर्षण

काठमाडौं । नेकपा एमालेका उपाध्यक्ष भीम रावलले भूतपूर्व गोर्खा सैनिकले बेलायतमा १० दिनदेखि जारी राखेको आमरण अनसनप्रति सरकारको ध्यानाकर्षण गराएका छन् ।

ब्रिटिश गोर्खा संयुक्त संघर्ष समितिका तर्फबाट सञ्चालित आमरण अनसनमा बसेकाहरूको स्वास्थ्य अवस्था बिग्रिएको भन्दै कूटनीति संवादका लागि सरकारको ध्यानाकर्षण गराएका हुन् । ब्रिटिश गोर्खा आन्दोलनका सन्दर्भमा संसदमा सरकारको धारणा आउनुपर्ने रावलको माग छ ।

‘लण्डनमा १० दिनदेखि नेपालका नागरिक एवं भूतपूर्व गोर्खा सैनिक आमरण अनसनमा बसेका छन् । उनीहरूको आन्दोलन र जायज माग पूरा गराउनेबारे सरकारले के गरिरहेको छ । सम्मानित सदनमा जानकारी गराउन माग गर्दछु’, रावलले भने ।

प्रतिनिधिसभाको शून्य समयमा बोल्दै नेता रावलले कूटनीतिक माध्यमबाट समस्या समाधान गर्न सरकार गम्भीर नदेखिएको आरोप समेत लगाए ।