टोकियो ओलम्पिकः अमेरिकी महिला भलिबल टोलीले जित्यो पहिलो स्वर्ण पदक

काठमाडौं । दुई पटकको च्याम्पियन ब्राजिलमाथि ३-० को सोझो सेटमा पराजित गर्दै अमेरिकी राष्ट्रिय महिला भलिबल टोलीले ओलम्पिकमा पहिलो स्वर्ण पदक जितेको छ ।

जापानमा जारी टोकियो ओलम्पिकको आइतबार भएको फाइनलमा ब्राजिलमाथि हाबी बनेको अमेरिकी महिला टोलीले पहिलो पटक ओलम्पिकमा स्वर्ण पदक जितेको हो ।

पहिलो सेट २१-२५ ले आफ्नो पक्षमा पारेको अमेरिकाले दोस्रो सेटमा २०–२५ को नजिता निकालेको थियो । तेस्रो सेटको सुरुआतदेखि नै हाबी बनेको अमेरिकाले १४–२५ को जितसँगै ऐतिहासिक स्वर्ण पदक जित्यो ।

अमेरिकी महिला टोली यसअघि तीन पटक फाइनलमा पुगेर पनि स्वर्ण पदक जित्न असफल रहेको थियो । सन् १९९२ मा चीनसँग सोझो सेटमा पराजित भएको अमेरिका २००८ र २०१२ मा ब्राजिलसँगै पराजित हुँदा स्वर्ण जित्न असफल रहेको थियो ।

जारी ओलम्पिकमा अमेरिकाले जितेको यो ३९औं स्वर्ण पदक हो । ३९ स्वर्ण, ४० रजत र ३३ कास्य गरी १११ पदकसहित अमेरिका पदक तालिकाको शीर्ष स्थानमा छ ।