नेपाल र भारतबीच दशरथ रंगशालामा दुई मैत्रीपूर्ण फुटबल म्याच हुने

काठमाडौं । नेपाल र भारतको राष्ट्रिय फुटबल टीमबीच मैत्रीपूर्ण फुटबल खेल हुने भएको छ ।  भदौ १७ र २० गते त्रिपुरेश्वरस्थित दशरथ रंगाशालामा म्याच तय गरिएको छ ।

अखिल नेपाल फुटबल संघ (एन्फा) र अखिल भारतीय फुटबल महासंघ (एआईएफएफ) बीचको सहमतिमा मैत्रीपूर्ण खेल आयोजना गरिएको हो । दुवै टोली आउदै गरेको साफ च्यापियनसिपको तयारी गरिरहेका छन् ।

यसअघि नेपालले भारतसँग २०१५ मार्चमा दशरथ रंगाशालामा खेलेको थियो । २०१८ को विश्वकप छनौट खेलमा दुवै टोली गोलरहित बराबरीमा रोकिएका थिए ।

अहिलेसम्म नेपाल-भारत टिम १९ खेलमा आमने-सामने भएका छन् । त्यसमध्ये भारतले १३ खेल जितेको छ । नेपालले भारतलाई दुईपटक जितेको छ । नेपालले अन्तिमपटक काठमाडौंमा भएको २०१३ को साफ च्याम्पियनसिपमा भारतलाई २-१ गोलले पराजित गरेको थियो ।