भूमि आयोग खारेजीविरुद्ध अखिल नेपाल किसान महासंघको प्रदर्शन (तस्बिरहरू)

काठमाडौं । अखिल नेपाल किसान महासंघले भूमि आयोग खारेज गर्ने सरकारको निर्णयविरुद्ध काठमाडौंमा प्रदर्शन गरेको छ ।

शेरबहादुर देउवा नेतृत्वको सरकारको उक्त निर्णयले भूमिहीन दलित, भूमिहीन सुकुम्बासी, अव्यवस्थित बसोबासको कारण जोखिमपूर्ण जीवन विताउन बाध्य समुदायप्रति गम्भीर अन्याय भएको भन्दै महासंघले विरोध गरेको हो ।

निर्णय अविलम्ब सच्याउन माग गर्दै महासंघका जिल्ला अध्यक्ष बलराम धितालले काठमाडौंका सीडीओमार्फत प्रधानमन्त्रीलाई ज्ञापन पत्र बुझाएका छन् ।

‘नेपालको संविधानले प्रदत्त गरेको अधिकारअनुसार गठन गरिएको आयोगले धमाधम काम गरिरहेको सबै स्थानीय तहसँग कार्यसम्पादन सम्झौतासमेत गरी, भूमिहीनको लगत संकलन, प्रमाणीकरण गरी भूमिहीनलाई जमिन वितरण गर्न आवश्यक जमिनको चाँजोपाँजोसमेत मिलाएको अवस्थामा आयोग विघटन गर्ने सरकारको निर्णयले भूमिहीनले फेरि जमिन पाउने अधिकारबाट बञ्चित भएका छन्’, ज्ञापन पत्रमा भनिएको छ, ‘राजनीतिक प्रतिशोध लिने मनसायले गरिएको यस निर्णयले भूमिहीनमाथि घोर अन्याय भएको हुँदा आयोग खारेज गने उक्त निर्णय अविलम्ब सच्याउन माग गर्दछौं ।’