पारस ! तिमीबिना मैदानमा प्रवेश गर्न कठिन हुनेछ

काठमाडौं । नेपाली क्रिकेट समर्थकहरूलाई स्तब्ध बनाउँदै पारस खड्काले अचानक सन्न्यास घोषणा गरे । उनको सन्न्यासको खबर समर्थकहरूका लागि मात्रै नभएर राष्ट्रिय टिमका सहकर्मी खेलाडीहरूका निम्तिसमेत अप्रत्याशित थियो ।

अन्तरमुर्खी स्वभावका पारस आफ्ना निजी कुराहरू निकै कम साथीहरूलाई मात्रै सेयर गर्छन् । त्यसैले राष्ट्रिय टिमका धेरै सदस्यलाई उनले यति चाँडै सन्न्यास लिनेछन् भन्ने आँकलन थिएन । सन्न्यास घोषणापछि उनीहरूले सामाजिक सञ्जालमार्फत पारसप्रति आफ्ना भावना पोखेका छन् ।

हेरौं पारसको सन्न्यासलाई लिएर क्रिकेटरहरूले के-के लेखे :

ज्ञानेन्द्र मल्ल

तिमीले क्रिकेट टोलीलाई मात्रै हैन देशका लाखौँ जनतालाई प्रेरणा दिएका छौँ । तिमी साँच्चै माहन लिडर र च्याम्पियन खेलाडी हौ । क्रिकेटमा तिम्रो योगदान अतुलनीय छ । तिमीबिना क्रिकेटको मैदानमा प्रवेश गर्न एकदमै कठिन हुनेछ । सबै कुराको लागि धन्यवाद पारस । हामीले पक्कै पनी तिमीलाई याद गरिरहनेछौँ ।

सन्दीप लामिछाने

टी-२० विश्वकप २०१४ मा हङ्ककङविरुद्ध तपाईंको ४१ रन र विकेटले एउटा बच्चालाई नेपालको प्रतिनिधित्व गर्ने सपना दियो । ऊ त्यो खेल हेरेर क्रिकेट एकेडेमी भर्ना भयो । हिजोजस्तै लाग्छ तपाईँले त्यो बच्चालाई नेपालको नामिवियाविरुद्धको खेलमा मिड विकेटबाट आफ्नो पहिलो ओभरको लागि बोलाउनुभयो ।

साथै उसलाई रमाउन र आराम गर्न भन्नुभयो । यो सबैभन्दा यादगार पल हो । र, ऊ अझै भगवानप्रति कृतज्ञ छ कि उसले नेपालको माहान खेलाडीको कप्तानीमा डेब्यु गर्‍यो । तपाईँले आफू पछाडि एक महान विरासत छोड्नुभएको छ ।

एक व्यक्तित्व जसले नेपाल क्रिकेटलाई सबैथोक दियो । तपाईंले अलि चाँडै छोड्नुभएकोमा म दु:खी छु, तर तपाईंको निर्णयको कदर गर्छु । जीवनको दोस्रो अध्यायका लागि शुभकामना । तपाईंको यादको सुगन्ध सधैँ वरिपरि हुनेछ । म साँच्चै निशब्द छु । नेपालको सेवा गर्नु भएकोमा धन्यवाद । हामी तपाईं र तपाईंको निस्वार्थ स्वभावप्रति सदैव ऋणी रहनेछौँ ।

वसन्त रेग्मी

शब्दबिनाको संसार छैन, तर आज मेरो मुखमा कुनै शब्द छैन । तिमीले क्रिकेटमा गरेको योगदान सबैलाई अविस्मरणीय छन् साथी । हेप्पि रिटायरमेन्ट ।

दीपेन्द्रसिंह ऐरी

एक दाइ, संरक्षक, कप्तान र सबैभन्दा माथि नेपाली क्रिकेटको इतिहास । तपाईंप्रति कृतज्ञता व्यक्त गर्न मसँग कुनै शब्द छैन । तपाईं मेरो जिवनको हरेक उतारचढावमा सधैँ सँगै हुनुहुन्छ । तपाईंले दिनुभएको साथ र मार्गदर्शनका लागि धेरै-धेरै धन्यवाद दाइ ।

नेपाली क्रिकेटमा तपाईंको योगदानका लागि र वर्षौंदेखि दिनुभएको सुझाव-सल्लाहका लागि धन्यवाद पारस दाइ । एक उल्लेखनीय कार्यजीवनका लागि बधाई तथा आगामी यात्राको लागि शुभकामना ।

विनोद भण्डारी

तपाईंलाई थाहा नै छ, मैले तपाईंको कप्तानीमा राष्ट्रिय टोलीमा डेब्यू गरेदेखि तपाईंको पाइलाहरू पछ्याइरहेको छु । तपाईंको निर्णयको म सम्मान गर्दछु्, तर तपाईंलाई बिदाई गर्दा मेरो मन दुखेको छ ।

मैदानभित्र होस् या बाहिर तपाईं मेरो प्रेरणाको स्रोत बन्नुभएको छ । यो साथ र मार्गदर्शनका लागि धन्यवाद । तपाईंबिना मैदान प्रवेश गर्नु पहिलेजस्तो सजिलो हुने छैन ।

करण केसी

२०१५ मा तपाईंको कप्तानीमा खेल्न शुरू गरेदेखि मैले धेरै कुरा सिकेको छु । मभित्रको ‘राम्रो म’ हुनको लागि तपाईंले सधैँ प्रोत्साहन र मद्दत गर्नुभएको छ । वर्षौंदेखिको प्रेरणा र एक महान व्यक्तित्व हुनुभएकोमा धन्यबाद । तपाईंले अवकाश लिनुभएकोमा म अझै स्तव्ध छु । तर, तपाईंको निर्णयको सम्मान गर्छु । तपाईंले नेपाल क्रिकेटका लागि गर्नुभएको सबै कुराको लागि धन्यवाद । तपाईं धेरै मिस हनुहुने छ ।

आसिफ सेख

तपाईं हाम्रो लागि एक अद्भुत मार्गदर्शक हुनुभयो । तपाईंले मलाई सिकाएको कुरा जीवनमा कहिल्यै बिर्सने छैन । तपाईं एक महान प्रेरणा स्रोत हुनुहुन्छ । तपाईंको जीवनको नयाँ अध्यायले तपाईंलाई जे गर्दा रमाइलो लाग्छ, त्यसका लागि असीमित समय प्रदान गरोस् ।

आरिफ सेख

दाइ, तपाईं धेरैका लागि प्रेरणाको स्रोत हुनुभएको छ । मैले तपाईंबाट धेरै कुरा सिकेको छु । आफ्नो व्यक्तिगत र व्यवसायिक जीवनमा उत्कृष्ट तपाईं जस्तो दाइ पाएकोमा म र नेपाल क्रिकेट भाग्यशाली छौँ । तपाईंले कार्यजीवनमा धेरै कुरा प्राप्त गर्नुभयो । तपाईंले निसन्देह राष्ट्रको सेवा गर्नुभयो । आगामी दिनमा पनि तपार्इँले धेरै कुरा प्राप्त गर्नु हुनेछ भन्नेमा म विश्वस्त छु । तपाईं आफू जस्तो हुनुहुन्छ, त्यस्तै भइरहनुस् । ह्याप्पी रिटायरमेन्ट ।

अविनाश बोहरा

सबै कुराको लागि धन्यवाद पारस दाइ । हामीजस्ता युवाहरूका लागि सधैँ तपाईं प्रेरणाको स्रोत हुनुहुन्छ । तपाईंको नेतृत्वमा खेल्नु मेरो लागि एउटा सु-अवसर थियो जुन म कल्पना पनि गर्दिन थिएँ । सधैँ मार्गदर्शनको अपेक्षा गर्छु । तपाईं सधैँ मेरो कप्तान रहनुहुनेछ । नेपालको सबैभन्दा महान क्रिकेटरलाई बिदाई ।

कुशल भुर्तेल

सबै कुराको लागि धन्यवाद पारस दाइ । वर्षौंदेखिको समर्पण र प्रतिबद्धताका लागि धन्यवाद । नयाँ शुरूआतको शुभकामना ।