टोकियोमा आज २६ स्पर्धाको फाइनल हुँदै, पदकमा चीनको छलाङ

एजेन्सी । टोकियो ओलम्पिकमा आज ९ खेलको २६ स्पर्धाको फाइनल खेलहरु हुनेछन् । यीबाहेक अन्य १२ खेलका सुरुआती चरणका खेलहरु हुनेछन् ।

आज आर्टिस्टिक जिम्न्यास्टिकको पुरुष पारालल बार, महिला बीम र पुरुष तेर्सो बार स्पर्धाको फाइनल हुनेछ । एथलेटिक्समा महिला लङजम्प, पुरुष ४ सय मिटर हर्डल्स, पुरुष पोलभल्ट, महिला ह्याम्मर थ्रो, महिला ८ सय मिटर र २ सय मिटर दौडका फाइनल खेलहरु हुनेछन् ।

बक्सिङमा महिला फिदर र पुरुष वेल्टर स्पर्धाको फाइनल हुनेछ । क्यानोई स्प्रिन्टमा मसहला के–वान २ सय मिटर, पुरुष सी–टू १ हजार मिटर, पुरुष के–वान १ हजार मिटर र महिला के–टू ५ सय मिटर स्पर्धाको फाइनल हुनेछ । साइक्लिङमा महिला टिम र पुरुष टिमको स्वर्ण छिनोफानो आज हुनेछ । डाइभिङमा पुरुष ३ मिटर स्प्रिङबोर्डको फाइनल हुँदैछ ।

सेलिङतर्फ महिलाको २ र पुरुषको २ गरी चार स्पर्धाको फाइनल हुँदैछ । भारत्तोलनमा पुरुष १ सय ९ केजी स्पर्धामा स्वर्ण छिनोफानो हुनेछ भने कुस्तीमा महिला फ्रिस्टाइल ६८ केजी तथा पुरुषतर्फ ७७ केजी र ९७ केजी स्पर्धामा फाइनल खेलहरु हुँदैछन् ।

यता पदकतालिकामा चीनले आफ्नो अग्रता फराकिलो बनाउँदै लगेको छ । १० दिनको खेल सकिँदा चीनले २९ स्वर्णसहित ६२ पदक जितेको छ । चीनलाई पछ्याइरहेको अमेरिकाले २२ स्वर्णसहित ६४ पदक जितेको छ । पदक संख्याका आधारमा अमेरिका अगाडि रहे पनि स्वर्णको गणनामा चीन धेरै अगाडि पुगिसकेको छ ।

अहिलेसम्म २ सय स्वर्ण पदकको छिनोफानो भएको छ । एउटामात्र स्वर्ण जित्ने देशको संख्या ३१ छ ।