आफूलाई एप्पलको सीइओ बनाउन टीम कुकलाई इलोन मस्कको आग्रह !

सीएनएन । यदि इलोन मस्कले यति धेरै कम्पनीहरु हाँकिरहेका हुने थिएनन् भने, उनी यतिबेला प्रतिष्ठित अमेरिकी प्रविधि कम्पनी एप्पलको प्रमुख कार्यकारी अधिकृत हुने थिए ।

पाँचवर्षअघि उत्पादनमा भएको ढिलाइ र टेस्लाले लन्च गर्ने भनेको मोडल-थ्रीमा सिर्जिएको अन्यौलताको बेला मस्कले टिम कुकलाई टेलिफोन गर्दै आफूलाई सीइओ बनाउन आग्रह गरेका थिए ।

जतिबेला एप्पलका वर्तमान सीइओले मस्कको कम्पनी टेस्ला खरिद गर्नेबारे विचार गरिरहेका थिए ।

मस्कले आफू सीइओ बन्ने सर्तमा मात्र टेस्ला विक्री गर्न खोजेको बताएका थिए । कुकले क्षणभरमै सम्झिए कि मस्कले आफ्नो जागिर खान खोजिरहेका छन् ।

वाल स्ट्रिट जर्नलका संवाददाता टीम हिगिन्सद्वारा लिखित पुस्तक ‘पावर प्ले : टेस्ला, इलोन मस्क एन्ड द बेट अफ दी सेन्चुरी’माथि लस एन्जल्स टाइम्समा प्रकाशित पुस्तक समीक्षामा यो कुरा उल्लेख छ ।

लेखक हिगिन्सले एप्पल, टेस्ला र अन्य प्रविधि कम्पनीबारे रिपोर्टिङ गरेका छन् । गत डिसेम्बरको एक ट्वीटमा मस्कले आफूले एप्पललाई टेस्ला विक्री गर्न चाहेको तर, आफूले कुकसँग कहिल्यै कुरा नगरेको बताएका थिए ।