ब्लिंकेनको दिल्ली दौडाहाको मुद्दा बन्यो ‘अफगानिस्तान’, चिनियाँ विदेशमन्त्रीद्वारा तालिवानी डेलिगेसनसँग भेट

दिल्ली । अमेरिका र भारतबीच अफगानिस्तान, कोभिड-१९, क्वाड, इन्डो–प्यासेफिक, मानवअधिकार र लोकतन्त्रजस्ता मुद्दाहरुमा बुधबार सहमति जुटेको छ ।

दिल्ली भ्रमणमा पुगेका अमेरिकी विदेशमन्त्री एन्टोनी ब्लिंकेनले प्रधानमन्त्री नरेन्द्र मोदी, राष्ट्रिय सुरक्षा सल्लाहकार अजित डोभल र विदेशमन्त्री जयशंकरलाई भेट गरे ।

दुई मुलुकबीच मुख्य मुद्दा अफगानिस्तान बन्यो । अमेरिकी सेना फिर्ता भएपछि तालिवानी विद्रोहीले अफगानिस्तानलाई पुनः नियन्त्रणमा लिन सुरु भएसँगै हुनसक्ने सम्भावित अस्थिरतालाई लिएर दुबै नेताले चासो व्यक्त गरेको जनाइएको छ ।

ब्लिंकेनले अफगानिस्तान अन्तर्राष्ट्रिय समुदायको नियन्त्रणबाट बाहिर जान सक्ने भन्दै चिन्ता व्यक्त गरे । संयुक्त पत्रकार सम्मेलनमा भारतीय विदेशमन्त्री एस जयंशकरले पनि छिमेकी मुलुकको रुपमा अफगानिस्तानको पछिल्लो अवस्थाले क्षेत्रीय स्थिरता भंग हुनसक्ने भएकाले दुई मुलुकले मिलेर शान्ति कायम गराउनुपर्ने बताएका थिए ।

अमेरिका र भारतका दुई विदेशमन्त्रीले अफगानिस्तानप्रति चासो व्यक्त गरिरहँदा बुधबार दिउँसो बेइजिङमा चिनियाँ विदेशमन्त्री वाङ यीले तालिवानी नेताहरुसँग भेटवार्ता गरेका थिए ।

वार्ता र समयको यो दृश्यले अफगानिस्तानमा पुनः एकपटक अमेरिका र चीन आमनेसामने हुने देखिएको छ । चिनियाँ विदेशमन्त्री यीले अफगानिस्तानको तालिवानका नेता मुल्लाह अब्दुल घानीसहितको डेलिगेसन टोलीलाई भेट गर्दै अफगानिस्तानमा शान्ति र स्थिरता कायम गर्न त्यहाँको राजनीतिक र सैनिक शक्ति सफल हुने विश्वास व्यक्त गरे ।

अफगानी नागरिकले नै आफ्नो विवेक र शक्तिबाट शान्ति कायम गर्नुपर्ने चिनियाँ विदेशमन्त्रीको जोड थियो ।