प्रियंका ! गर्भावस्था तिम्रो गर्व हो, तर राष्ट्रिय पर्व होइन – Nepal Press
ब्लग

प्रियंका ! गर्भावस्था तिम्रो गर्व हो, तर राष्ट्रिय पर्व होइन

कुनै–कुनै विषय यस्ता हुन्छन्, जसमा दिगमिग लागी–लागी पनि कलम चलाउनैपर्ने वाध्यता आइपर्छ । एक महिलाको गर्भावस्थाजस्तो नितान्त निजी विषयमा सार्वजनिक टिप्पणी लेख्दै गर्दा यस्तै सकस भइरहेको छ । नायिका प्रियंका कार्कीको भुँडी प्रदर्शनलाई पूर्वप्रधानमन्त्री डा. बाबुराम भट्टराईले ‘नयाँ जनवादी क्रान्ति’ सरह मानेर महिमामण्डन नगरिदिएको भए सायद यो ब्लग लेखिने थिएन ।

कुनै समय यस पङ्तिकारको फेभरेट लिस्टमा थिइन् प्रियंका । अभिनयमा अब्बल, नाच्न पारंगत, रुप–जिउडाल चट्ट मिलेकी, सबै हिसाबले एक परिपूर्ण नायिका । चलचित्रबाहिर पनि उत्तिकै सशक्त प्रस्तुति दिनसक्ने उनको क्षमताले थप प्रभावित थिएँ । आफ्नै बलबुतामा उनले नेपाली चलचित्रमा उच्च स्थान बनाइन् । लामो समय नम्बर एक नायिकाको ताज भिरिन् ।

तर, प्रियंकाप्रति मेरो मनमस्तिष्कमा रहेको पुरानो छवि अहिले नराम्ररी केरमेट भइसकेको छ । जसै उनी आयूष्मान देशराज जोशीसँग प्रेममा परिन्, पचाउनै नसकिने उत्ताउला हर्कतहरु देखाउन थालिन् । प्रियंका र आयूष्मानको जोडीले प्रेम प्रदर्शन गर्ने नाममा सार्वजनिक स्थानहरुमै उछृङ्खलता र अश्लिलताको भरपुर प्रसार गर्यो । सामाजिक सञ्जालमा झन् बढी प्रदूषण फैलाए उनीहरुले । त्यहीँबाट प्रियंकाको करिअरमा पनि डाउनफल सुरु भयो ।

जसै प्रियंका गर्भवती भइन्, त्यसपछि सुरु भयो उत्ताउलोपन र उछृङ्खलताको अर्को चक्रवात् । आफ्ना डाइ हार्ड फ्यानहरुलाई समेत दिक्क पार्ने गरी उनले आफ्नो ‘बेबी बम्प’ को भद्दा प्रदर्शनी सुरु गरिन् ।

खैर, अब उनीहरु अब वैधानिकरुपमै श्रीमान–श्रीमती भइसकेका छन् । पहिलो विवाह छोटो समयमा असफल भएको चोट प्रियंकाले सायद भुलिन् होला । उनको निजी जीवनले नयाँ लय समात्यो । तर, लयभंग भएको करिअर भने लिकमा फर्किन सकेन । केही वर्षदेखि  उनलाई ठूलीआमा, फुपू टाइपका रोलहरुमा बढी अफर आउन थालेका छन् ।

प्रियंका–आयूष्मान विवाहपछि सामाजिक सञ्जालमा अलिकति अमनचयन कायम भएको थियो ! केही समय उनीहरु आफ्नै दुनियाँमा रमाए । विवाहलगत्तै देशव्यापी लकडाउन भएकाले घरमै हनिमुन मनाए उनीहरुले । नतिजास्वरुप प्रियंका दुई जिउकी भइन् । देशराज परिवारमा नयाँ सदस्य थपिने तय भयो ।

जसै प्रियंका गर्भवती भइन्, त्यसपछि सुरु भयो उत्ताउलोपन र उछृङ्खलताको अर्को चक्रवात् । आफ्ना डाइ हार्ड फ्यानहरुलाई समेत दिक्क पार्ने गरी उनले आफ्नो ‘बेबी बम्प’ को भद्दा प्रदर्शनी सुरु गरिन् । आफ्नो भुँडीलाई उनले सामाजिक सञ्जालमा यत्रतत्र छताछुल्लै पारिन् ।

प्रियंकाले पहिलोपटक सुखद खबर बाँड्ने क्रममा ‘वी आर प्रिग्नेन्ट’ (हामी गर्भवती भयौं) लेखेर केही अनौठो गर्ने छनक दिइसकेकी थिइन् । केही दिनपछि उनले नाइटोबाट जुस पिएको भद्दा तस्वीर पोष्ट गर्दै आफ्नो गर्भावस्थामाथि आफैंले मजाक सुरु गरिन् । यही बीचमा प्रियंकाको अत्याउने खालको अन्तरवार्ता आयो, जसमा उनले आफू कसरी गर्भवती भएँ भनेर सप्रसंग व्याख्या गरेकी छन् । सम्भवत यस्तो अभिव्यक्ति तपाईंले दुनियाँका बोल्डभन्दा बोल्ड अभिनेत्रीहरुको मुखबाट पनि सुन्न पाउनुभएको थिएन ।

प्रियंकाले यस्तो भनेकी थिइन्ः

‘आयूष्मानले के भने भने, ल ठीक छ । अब डिसेम्बरमा बेबी पाउने हो भने अप्रिल–मेतिर ट्राइ गर्नुपर्यो नि त । तर, अप्रिल–मेमै फर्स्ट ट्राइ नगरौं । अगाडि पनि ट्राइ गर्दै जाउँ न । अप्रिल मेमा ट्राइ गर्नेवित्तिकै प्रेग्नेन्ट हुन्छ भन्ने त छैन । सो लेट्स ट्राइ कपल अफ टाइम्स भनेर, हाम्रो चैं फर्स्ट ट्राइ थियो क्या यो, जुन हामीले ट्राइ गर्यौं । ल अब चाहिँ ट्राइ गर्न स्टार्ट गर्ने, विस्तारै ट्राइ गर्दै जाने, डिसेम्बरमा बेबी पाउने गरी । त्यो केसमा चाहिँ हामी यस्तो लक्की भयौं कि फस्ट ट्राइमै प्रेग्नेन्ट भयौं क्या ।’

प्रियंकाले भनेको ‘ट्राइ’ को तात्पर्य श्रीमानसँगको यौनसम्पर्क हो । कुनै पनि पुरुष महिलाबीचको यौनसम्पर्कभन्दा निजी विषय संसारमा अरु के होला ? अनि पहिलो यौनसम्पर्कमै सफल भयौं भनेर सञ्चारमाध्यममा छाती पिट्नु्भन्दा हाँस्यास्पद संसारमा अरु के होला ?

दुनियाँलाई मनोरञ्जन दिने अर्को अन्तरवार्ता पनि आयो प्रियंकाको:

‘अस्ति एकचोटि मलाई एकजनाले भन्नुभयो, खाटमा पल्टेर सबैतिर छाम । अनि जहाँ कडा पार्ट छ, त्यो चाहिँ टाउको हो भनेर सिकाउनुभाकोथ्यो । आयूष र म खाटमा पल्टेर छामेर कहाँ कडा भेट्टाउँछ भनेर ट्राइ गर्‍यौं क्या‘ ।’

प्रियंकाका तस्वीर र अन्तरवार्ताहरुमा नकारात्मक प्रतिक्रिया र गालीगलौजको जति वर्षा भए पनि उनी रोकिइनन् । उल्टो झन्–झन् हौसिँदै गइन् । तरह–तरहले भुँडी फिँजाएर दिनदिनै सार्वजनिक प्रदर्शन गर्दै आफ्नो मातृत्वमाथि मजाक गरिरहिन् ।

सम्भवतः अब केही दिनभित्रमै यो सिलसिला टुंगिने छ । प्रियंका पहिलो बच्चा जन्माउने संघारमा छिन् । उनलाई अग्रिम शुभकामना ।

०००

प्रियंकाको भुँडी अहिलेसम्म सञ्चारमाध्यमको पेज थ्रिका गसीप मात्रै बनिरहेका थिए । तर, पूर्वप्रधानमन्त्री डा. बाबुराम भट्टराईले उनको प्रशंसामा ट्विट गर्दै यसलाई मूलधारकै बहसमा तानिदिएका छन् । सामाजिक सञ्जालमा अनेक तर्कका बिस्कुन लगाएर पक्ष र विपक्षमा माथापच्ची जारी छ ।

एकथरिले प्रियंकाको भुँडी प्रदर्शनलाई नेपालमा माओवादी समस्यापछिकै ठूलो राष्ट्रिय समस्याझैं मानेर टाउको दुखाइरहेका छन् । अर्काथरिले चाहिँ माओवादीले गरेको १० वर्षे जनयुद्धभन्दा ठूलो क्रान्ति प्रियंकाले गरेजसरी उनको जयजयकार गरिरहेका छन् । जे होस, सामाजिक सञ्जाल प्रयोगकर्तालाई राजनीतिबाहेक कुनै विषयले ध्यान खिचेको छ भने त्यो प्रियंकाको भुँडीले नै हो ।

गर्भावस्थामा ठूलो भुँडी देखाएर यसअघि पनि थुप्रै सेलिब्रिटीहरुले प्रिग्नेन्सी फोटोसुट गरेकै थिए । तर, प्रियंकाजति विवादमा उनीहरु यसकारण आएनन् कि उनीहरुले यसरी ‘अत्याएका’ चाहिँ थिएनन् । अहिले अर्की नायिका ऋचा शर्मा पनि गर्भवती छन् । तर उनले आफ्नो भुँडीलाई बारम्बार सार्वजनिक स्थानमा तेर्स्याएर भाइरल बन्ने चेष्टा गरेकी छैनन् ।

भुँडी प्रदर्शनलाई आधुनिकता र महिला सशक्तीकरणको बिम्बका रुपमा ब्याख्या गर्नेहरुप्रति चाहिँ टिठ लागेर आउँछ । यो सोच र समझको न्यूनताको परिणाम हो ।

नेपाली महिलाको सबैभन्दा ठूलो गहना नै हो लज्जा । यसो भन्दा कतिपय क्रान्तिकारी, महिलावादीलाई पारो तात्छ । तर, यथार्थ यही हो कि कुनै चिजलाई जब लुकाएर राखिन्छ, त्यसप्रतिको कौतुहल र महत्व बढ्छ । जब उदांगो बनाइन्छ, महत्व स्वतः घट्छ । कुनै युवतीलाई विकिनीमा भन्दा सारीचालोमा बढी ग्ल्यामरस किन देखिन्छ ?

अहिले प्रियंकाका समर्थकहरुको जोडदार तर्क छ, आफ्नो शरीर आफ्नो अधिकार । आफूलाई मन लागेको कामकुरा गर्दा अरुले टाउको दुखाउनु आवश्यक छैन भन्ने पाठ पढाइरहेका छन् उनीहरु । तर, उनीहरुले बुझ पचाएको कुरा के हो भने आफ्नै सम्पत्तिको गलत प्रयोग गर्यो भने पनि कानून लाग्छ । अस्ति भर्खरै आफ्नो घरको कोठा भाडामा दिन नमान्दा एक घरबेटी पक्राउ परिन् । शरीर पनि त्यही हो ।

शरीर आफ्नो हो भनेर तपाईंले यसलाई सार्वजनिक स्थानमा जथाभावि प्रदर्शन गर्न सक्नुहुन्न । सडकमा कोही नांगै हिँड्यो भने पुलिसले समात्छ । त्यहाँ किन व्यक्तिगत स्वतन्त्रताको कुरा आउँदैन ? किनकी सार्वजनिक स्थानमा नग्नता फैलाउन नपाइने कानून छ । सामाजिक सञ्जाल पनि सार्वजनिक प्लेटफर्म हो । यहाँ पनि व्यक्तिगत स्वतन्त्रताका नाममा जथाभावी पोस्ट गर्न मिल्दैन । देशको कानून विपरीतका मात्र होइन, सामाजिक मूल्य–मान्यता विपरितका, अश्लिलता एवं विकृति फैलाउने सामग्रीहरु सेन्सर हुन्छन् र हुनुपर्छ ।

भुँडी प्रदर्शनलाई आधुनिकता र महिला सशक्तीकरणको बिम्बका रुपमा ब्याख्या गर्नेहरुप्रति चाहिँ टिठ लागेर आउँछ । यो सोच र समझको न्यूनताको परिणाम हो । उदेकलाग्दो के छ भने जुन तप्का महिलाको शरीर बिकाउ माल होइन भन्दै आजको विज्ञापन बजारदेखि मनोरञ्जन उद्योगसम्मको खेदो गर्छ, त्यही तप्का भुँडी देखाउँदा महिलाको सशक्तीकरण हुने लाजमर्दो बकवास गरिरहेको छ ।

भुँडी प्रदर्शन गर्दा महिला सशक्तीकरण हुने भए, मातृत्वको सेलिब्रेसन हुने भए, स्तन/योनि पनि त देखाए भयो । त्यसो गर्दा मातृत्व सेलिब्रेसन र महिला सशक्तिकरणले झन् सगरमाथाको उचाइ नै छुन्थ्यो कि ? यही तरिकाले हौस्याउँदै जाने हो भने केही वर्षमै त्यस्तो ‘क्रान्ति’ पनि देख्न नपाइएला भन्न सकिन्न ।

०००

गर्भावस्था भनेको कुनै पनि महिलाका लागि जीवनको अविस्मरणीय कालखण्ड हो । आफूभित्र नयाँ जीवन हुर्किरहेको अनुभूतिमा प्राप्त हुने असीम आनन्दलाई एउटी आमाले मात्रै महसुस गर्न सक्छिन् । साथै, यो एउटा चुनौतिपूर्ण उपक्रम पनि हो । ९ महिनासम्म एउटा जीवनलाई पेटभित्र जोगाएर, हुर्काएर सुरक्षित जमिनमा अवतरण गराउने क्रममा हरेक आमाले कम्तिमा एकपटक मृत्युवोध गरेका हुन्छन् । त्यसैले त आमालाई जीवनदाता भनिन्छ ।

मातृत्वको पुनित खुशीलाई विभिन्न तरिकाले सेलिब्रेसन गर्ने गरिन्छ । यसमा संसारभर आ–आफ्नै संस्कृति–संस्कार छन् । नेपालीहरुका पनि आफ्नै मौलिक संस्कार छन् । बच्चा जन्माउनुअघि आमालाई दहीच्यूरा खुवाउने, बच्चा जन्मिएपछि न्वारन, पास्नी गर्ने कुराहरुका धार्मिक–सांस्कृतिक महत्व आफ्नो ठाउँमा भए पनि ती अन्ततः ‘सेलिब्रेसन’ नै हुन् ।

गर्भवती हुनु गौरव हो, तर कुनै अद्भूत आश्चर्य होइन । प्रियंकाले आफ्नो मातृत्वमा जति पनि गर्व गर्न सक्छिन् । उनले एकाधपटक तस्वीर हाल्दा ठूलो कुरा थिएन ।

तर, आज आफ्नो संस्कृतिमा चित्त नबुझाएर शहरीया समाजको एउटा तप्का विदेशीहरुको अन्धानुकरणमा निमग्न छ । पैसा कहाँ फालुँ भनेजस्तो अवस्थामा रहेको यो मुठ्ठीभरको जमातले जब कुनै रिवाजलाई अंगाल्छ, अरु पनि त्यसको सिको गरेर पछिपछि दौडिन थाल्छन् । अझ सेलिब्रिटीहरुले त्यसलाई पछ्याएपछि त विजुली गतिमा तलसम्म प्रसार हुन्छ । परिणामस्वरुप आज विश्वमा भएभरका रीतिरिवाजको भारी नेपालीले बोकेर हिँड्नपरेको छ । देशकै रीतिरिवाजहरु खर्चिला भएर आमजनतालाई धान्न गाह्रो परिरहेका बेला आयातित पनि थोपरिएपछि मध्यमवर्गीय नेपालीलाई थेग्नै नसक्ने बोझ सिर्जना भएको छ ।

प्रेग्नेन्सी फोटोसुट र बेबी सावर त्यस्तै आयातित संस्कृति हुन्, जो अहिले नेपालको शहरीया जमातमा फेसन बनिरहेको छ । नेपाली मौलिकता र सस्कृतिसँग ठ्याम्मै मेल नखाने सेलिब्रेसन हुन् यी । आमरुपमा आज पनि हाम्रा दिदीबहिनीहरु गर्भावस्थाको पेटलाई छोपेरै हिँड्न रुचाउँछन् । गर्भवती महिलाको ठूलो भुँडीमा साथीभाइदेखि सासु–ससुरासम्मले पालैपालो छाम्दै, चुम्मा खाँदै गरेको दृष्य हाम्रा लागि सुपाच्य छैनन् । तर, पचाउन नसक्दा नसक्दै पनि सामाजिक सञ्जालमा ‘वाउ’, ‘लभ्ली’ भन्दै कमेन्ट गर्नुपरेको छ ।

हाम्रो आफ्नै सामाजिक, सांस्कृतिक मूल्यमान्यताहरु छन् । आधुनिकताको बर्को ओढेर आफ्ना मूल्य–मान्यताहरुलाई भत्काउँदै, आयातित संस्कृतिका पछि कुद्दै हामी आफ्नो देशलाई विदेशी मालवस्तुको बजारमा परिणत गरिरहेका छौ । विदेशबाट संस्कृति भित्रिँदा त्यससँग सम्वन्धित भौतिक वस्तुहरु पनि भित्रिन्छन् । नेपाली पैसा विदेशिन्छ । त्यसकारण देशको अर्थव्यवस्थाका लागि पनि यो प्रवृत्ति हानीकारक छ ।

०००

गर्भवती हुनु गौरव हो, तर कुनै अद्भूत आश्चर्य होइन । प्रियंकाले आफ्नो मातृत्वमा जति पनि गर्व गर्न सक्छिन् । उनले एकाधपटक तस्वीर हाल्दा ठूलो कुरा थिएन । तर, उनको प्रस्तुति यस्तो छ मानौं, मानव इतिहासमै पहिलोपटक उनले यो काम गर्दैछिन् । मानौं, उनले सामान्य बच्चा होइन, आफ्नो कोखबाट ‘एलियन’ नै पैदा गर्न गइरहेकी छन् । मानौं, उनको गर्भावस्था राष्ट्रिय उत्सवको विषय हो ।

प्रियंकाजी, भुँडी तपाईंको हो । यसलाई आफूले चाहेजसरी प्रयोगमा ल्याउन सक्नुहुन्छ । तर, यति सस्तो तरिकाले सामाजिक सञ्जालमा यसलाई फिँजाएर आफैंलाई र आफ्नो गर्भमा रहेको बच्चालाई मजाक नबनाउनुस, प्लिज । तपाईंको बच्चा भोलि बुझ्ने भएपछि आफ्ना आमाबुवाका हर्कतहरु हेरे लज्जित बन्नु नपरोस ।


प्रतिक्रिया

4 thoughts on “प्रियंका ! गर्भावस्था तिम्रो गर्व हो, तर राष्ट्रिय पर्व होइन

  1. Kati dherai fursad , yeti fursad Aafno lekh ani sabda chayan ma lagaidiyeko vaye ma aadi bata disgusted vayera chhodne thienah

  2. Don’t understand why it’s such a big deal.
    Clearly, it’s her body and she has all the right to flaunt it the way she want. No offence and but this is such a stereotypical double standard south asian mentality. She’s a grown up and very well knows what she’s posting. If she doesn’t mind flaunting her belly, pregnant or not then nobody else should have a problem with it. I understand it has become like a trend per se to post such pictures in social platform. But that’s not the point.
    Its about individual right . I am not saying women’s right. It’s about freedom to express yourself. Just because the society doesn’t consider it right doesn’t mean it’s wrong or indecent. Every woman or men has right to their body and what they do with it. Whether they cover it with burqa or walk around showing every inch of their skin , it’s their right . Neither I , you or anyone has any right to demonstrate any objection over that.
    So why not just liberate past social and cultural norms and boundaries and look at it with a different perspective. As in, may be just not concern into calling someone out in public just because she’s showing her baby bump and her belly
    or any other body part . There’s nothing wrong with that. Nothing to be ashamed of at all.
    May be just let her or anyone live their life the way they want, bare or covered. There are so much more
    important events and
    interesting issues we would
    actually enjoy reading about and may be learn something from it.
    ✌️ ✌️

  3. आयुष्मान देशराज जोशी बरु गर्भवती भएको भए बरु राष्ट्रिय बिषय बन्नु स्वभाविक हो तर प्रियंका जी गर्भवती हुनु अद्भूत आश्चर्य होइन । शरीर आफ्नो हो भनेर तपाईंले यसलाई सार्वजनिक स्थानमा जथाभावि प्रदर्शन गर्न सक्नुहुन्न ।

  4. Pahila pregnant vayo ki bhudi lukaune natra pregnant keti lai jiskaune kaam hunthyo. Jhan actress haru ta lukthe ani baccha vaesi ni moti vayo vanera hepinthyo. Priyanka le yo sabai soch lai todera naya environment create gareki chin.

Leave a Reply

Your email address will not be published. Required fields are marked *