एमाले बैठक जारी, सबै सदस्यलाई १० बुँदे सहमति बाँड्दै कार्यान्वयनमा जोड

काठमाडौं । नेकपा एमालेको १०औं केन्द्रीय कमिटीको दोस्रो दिनको बैठक जारी छ । ललितपुरको च्यासलस्थित तुल्सीलाल स्मृति प्रतिष्ठानमा बसिरहेको बैठक हिजोकै निरन्तर बैठक हो ।

आजको बैठकमा एमाले एकताका लागि गठित तत्कालीन कार्यदलले तयार पारेको १० बुँदे सहमति सदस्यहरूलाई वितरण गरिएको छ । कार्यदलका तर्फबाट स्थायी कमिटी सदस्य सुवास नेम्वाङले सो सहमति कार्यान्वयनमा इमान्दार हुनुपर्नेमा जोड दिएका छन् ।

एमालेले पार्टीको आन्तरिक समस्या समाधानको लागि गरेको १० बुँदे सहमतिलाई अनुमोदन गरिसकेको छ ।

बैठकमा शेरबहादुर देउवालाई प्रधानमन्त्रीमा विश्वासको मत दिने माधवकुमार नेपालसहितका २२ सांसदलाई कारवाहीको थप प्रक्रियाबारे पनि छलफल हुने बताइएको छ । एमालेले उनीहरूलाई अनुशासनको कारवाहीका लागि २४ घण्टे स्पष्टीकरण सोध्ने हिजै निर्णय गरिसकेको छ ।

जारी बैठकमा प्रदेशको पार्टी अवस्थाबारे सम्बन्धित नेताहरूले जानकारी गराउने, सर्वोच्चको फैसलाप्रति पार्टीको दृष्टिकोण, ओली नेतृत्वको सरकारले गरेका कामको समीक्षा गर्ने साथै आगामी दिनमा राजनीतिक र सांगठानिक काममा पार्टीको भूमिकाबारे पनि छलफलको मुख्य एजेण्डा छ ।