माधवसहितका नेतालाई ‘लाल गद्दार’ भन्दै एमाले बैठकस्थल बाहिर प्रदर्शन (भिडियोसहित)

काठमाडौं । नेकपा एमालेको केन्द्रीय कमिटी बैठक बसिरहेको बेला बैठकस्थल तुल्सीलाल स्मृति प्रतिष्ठानबाहिर कार्यकर्ताले जनमतको अपमान गरेको भन्दै माधव नेपालसहितका नेतालाई कारवाहीको लागि दबाब दिएका छन् ।

ब्यानर र प्लेकार्डसहित प्रदर्शनमा उत्रिएका कार्यकर्ता र अखिलको समूहले जनताले सूर्यमा भोट हालेर जिताएकाले संसदमा कांग्रेसलाई भोट दिएको भन्दै त्यस्ता नेतालाई कारवाही गर्न माग गरेका छन् ।

माधव नेपाल पक्षका नेता कार्यकर्तालाई ‘लाल-गद्दार’ को संज्ञा दिँदै उनीहरूले ‘माकुने चोर मुर्दावाद’, ‘व्यापारी र तस्करलाई टिकट दिन बन्द गर’, ‘भ्रष्टाचारीहरूलाई एमाले पार्टी बहिष्कार गर’ जस्ता नारा लगाएका छन् ।

एमाले १०औं केन्द्रीय कमिटी बैठकले प्रधानमन्त्री शेरबहादुर देउवाको पक्षमा विश्वासको मत दिने वरिष्ठ नेता माधवकुमार नेपालसहित २२ जना सांसदलाई अनुशासन उल्लंघनको विषयमा २४ घण्टे स्पष्टीकरण सोध्ने निर्णयसमेत गरेको छ ।