ब्राजिलका राष्ट्रपतिको दाबी: अर्जेन्टिनालाई ५-० ले हराउँछौं

काठमाडौं । ब्राजिलका राष्ट्रपति जैयर बोल्सोनारोले ब्राजिलले अर्जेन्टिनलाई ५-० गोलको नतिजामा पराजित गर्दै कोपा अमेरिका जित्ने बताएका छन् ।

आइतबार बिहान हुने फाइनलअघि दक्षिण अमेरिकी नेताहरूको भेटमा बोल्सोनारोले अर्जेन्टिनी समकक्षी अल्बर्टो फर्नान्डेजलाई जिस्क्याउँदै ब्राजिल ५-० ले विजयी हुने बताएका हुन् ।

‘एक मात्र प्रतिद्वन्द शनिबार माराकानामा हुन्छ,’ पाँच औंलाको संकेत दिँदै बोल्सोनारोले भने, ‘ब्राजिलले ५-० ले जित्छ ।’

दक्षिण अमेरिकी डर्बीमा अर्जेन्टिनी कप्तान लियोनेल मेसीसामु पहिलो अन्तर्राष्ट्रिय उपाधि जित्ने मौका छ । व्यावसायिक फुटबलका सर्वाधिक सफल खेलाडी मेसी अन्तर्राष्ट्रिय स्टेजमा उपाधिविहीन छन् ।