भासिएको कमला पुलबारे छानविनको माग गर्दै सिरहामा प्रदर्शन

जनकपुरधाम । १० वर्ष लगाएर निर्माण गरिएको हुलाकी सडकअन्तर्गतको कमला पुल भासिएपछि सिरहामा आन्दोलन सुरू भएको छ ।

पुल भासिएको विषयमा छानविन गर, अविलम्ब पुल निर्माण गर, दोषीलाई कारबाही गरलगायतका नारा उल्लेखित प्लेकार्ड बोकेका युवाहरूले सिरहा सदरमुकाममा प्रदर्शन गरेका हुन् । सरकारको उदासिनताले ठेकेदार गुणस्तरहीन काम गरेको र त्यही कारण पुल भासिएको उनीहरूको भनाइ छ ।

यसैबीच, धनुषाका प्रमुख जिल्ला अधिकारी बन्धुप्रसाद बास्तोलाले भासिएको पुलको निरीक्षण गरेका छन् । उनले पुल पुन: निर्माण ठेकेदार कम्पनीलाई गर्नुपर्ने भन्दै समयमा पुल संचालन नहुनु राज्यलाई घाटा भएको उनले बताए ।

सिरहा-धनुषा जोड्ने कमला पुल निर्माणको ठेक्का २०६८ मै पप्पु-लुम्बिनी जेभीले पौने २५ करोडमा ठेक्का लिएको थियो । तर, पछि पप्पुले काम छाडेपछि लुम्बिनी बिल्डर्सले बाँकी काम गराएको छ ।