हाम्रो टिमका अभियन्ता पक्राउ परेपछि पल शाहको आग्रह : चाँडै रिहा गरियोस्

काठमाडौं । सरकारी जग्गा कब्जा गरेको आरोपमा पक्राउ परेका १८ जना अभियन्तालाई रिहा गर्न अभिनेता पल शाहले आग्रह गरेका छन् ।

हाम्रो टीम नेपाल नामक सामाजिक अभियानका सदस्य समेत रहेका शाहले सामाजिक संजालमार्फत उक्त आग्रह गरेका हुन् । उनले अभियन्तालाई पक्राउ गरेर सरकारले दमन गरेको आरोप समेत लगाएका छन् ।

चाँडोभन्दा चाँडो सबैजनालाई रिहा गर्न पहलको आग्रह छ । लोकप्रिय अभिनेता पल यही अभियानअन्तर्गत रहेर केही महिनायता सामाजिक कार्यमा सक्रिय छन् ।

हाम्रो टीम नेपाल अभियानले कोरोना महामारीको बेला सर्वसाधारणलाई निःशुल्क खाना खुवाउँदै आएको थियो भने विभिन्न स्वास्थ्य संस्थामा अक्सिजन उपकरण लगायतका सामग्री पनि उपलब्ध गराएको थियो ।