युक्रेनलाई हराउँदै अस्ट्रिया पहिलो पटक युरोपियन च्याम्पियनसिपको नकआउटमा

काठमाडौं । समूह चरणको अन्तिम खेलमा युक्रेनमाथि १-० को जित निकालेको अस्ट्रिया युरो २०२० को नकआउटम पुगेको छ ।

सोमबार रोमानियामा भएको खेलमा अस्ट्रियालाई जित दिलाउन अस्ट्रियाका लागि क्रिस्टोफ बौमगार्टनेरले एक मात्र गोल गरे । प्रतिस्पर्धात्मक खेलको २१औं मिनेटमा कप्तान डेभिड अलाबाले कर्नरमार्फत गरेको क्रसलाई गोलमा परिणत गर्दै बौमगार्टनेरले अस्ट्रियालाई अग्रता दिलाएका थिए ।

सोही अग्रताको सफल बचाऊ गर्दै अस्ट्रियाले समूह उपविजेता बन्दै अन्तिम १६ मा स्थान सुरक्षित गरेको हो । समूह सीको उपविजेता बनेको अस्ट्रियाले क्‍वार्टरफाइनल प्रवेशका लागि इटालीको सामना गर्नेछ ।

इटाली समूह एको विजेता बन्दै अन्तिम १६ मा पुगेको हो । इतिहासमा पहिलो पटक अन्तिम १६ मा पुगेको अस्ट्रियाले क्वार्टरफाइनलसम्म पुग्नका लागि २९ खेलमा अपराजित रहेको इटालीलाई पराजित गर्नुपर्नेछ ।

यी दुई बीचको प्रि-क्वार्टरफाइनल आगामी आइतबार लन्डनस्थित वेम्ब्ली स्टेडियममा हुनेछ ।