रोनाल्डोलाई पछ्याउँदै करिश्मा, सफ्ट-ड्रिङ्कभन्दा पानी पिउन आग्रह

काठमाडौं । गतसाता पोर्चुगिज फुटबल स्टार क्रिस्टियानो रोनाल्डो बेग्लै कारण चर्चामा आए । पत्रकार सम्मेलनमा टेबुलबाट कोकाकोलाको बोतलहरु हटाएपछि उनी विश्वभरि मिडिया हेडलाइन बने ।

उनले प्रेसमिटको टेबुलबाट कोकको बोतल हटाएर पानीको बोतल राखे । सफ्ट-ड्रिङ्कभन्दा पानी पिउनु राम्रो हुने संकेत गर्दै उनले पानीको बोतल उचाले । यो घटना लगत्तै कोकको सेयर बजारमा गिरावट आयो ।

अहिले उनै रोनाल्डोलाई पछ्याउँदै नेपालसहितका विश्व सेलेव्रिटीले सफ्ट-ड्रिङ्कभन्दा पानी पिउनु स्वास्थ्यका लागि फाइदाजनक हुने भन्दै सामाजिक संजालमार्फत धारणा राखिरहेका छन् । सर्वसाधारणदेखि प्रशंसकले समेत रोनाल्डोलाई समर्थन गरिरहेका छन् ।

करिश्माले पनि फेसबुकमार्फत ‘से नो टु काबर्न’ लेख्दै सोडायुक्त पेय पदार्थ नपिउन अनुरोध गरेकी छिन् । अमेरिकामा हुँदा आफूले सब-वे फास्टफुडमा काम गरेको स्मरण गर्दै करिश्माले सफ्ट-ड्रिङ्क बिक्री गर्दा पनि त्यतिबेला विष बाँडिरहेको जस्तो महसुस भएको आफूले गरेको उल्लेख गरेकी छिन् ।

‘कृत्रिम पेयपदार्थ’ नपिउन समेत करिश्माले आग्रह गरेकी छिन् । करिश्मा स्वास्थ्यलाई लिएर निकै सचेत समेत हुने गरेकी छिन् ।