३२ जना महिलाद्वारा पोर्नहब वेबसाइटविरुद्ध मुद्दा दायर, अनुमतिबिना यौन भिडिओ बेचेर नाफा कमाएको आरोप – Nepal Press

३२ जना महिलाद्वारा पोर्नहब वेबसाइटविरुद्ध मुद्दा दायर, अनुमतिबिना यौन भिडिओ बेचेर नाफा कमाएको आरोप

काठमाडौं । आफूहरुको अनुमति बिना भिडिओ सार्वजनिक गरेको भन्दै बलात्कार र यौन शोषण मामिलाका पीडित ३२ जना महिलाले चर्चित वेबसाइट पोर्नहबविरुद्ध मुद्दा दायर गरेका छन् । उक्त वेबसाइटको प्यारेन्ट कम्पनी माइन्डगिक विरुद्ध ‘क्लासिकल क्रिमिनल इन्टरप्राइज’ संचालन गरेको भन्दै ती महिलाले संयुक्तरुपमा मुद्दा दायर गरेका हुन् ।

बलात्कार, बालयौन दुर्व्यवहार, रिभेन्ज पोर्न (बदला लिनका लागि राखिने सेक्स भिडिओ) र सहमति बिनाका यौन कार्यबाट कम्पनीले नाफा आर्जन गरिरहेको आरोपमा बिहीबार मुद्दा दायर भएको बीबीसीले जनाएको छ ।

३२ जना पीडितहरुको तर्फबाट अमेरिकाको क्यालिफोर्नियास्थित केन्द्रीय जिल्ला अदालतमा मुद्दा दर्ता गरिएको छ । पीडितहरुको तर्फबाट कानून व्यवसायी ब्रोन रुड्निकले मुद्दा दर्ता गरेका हुन् । एउटी महिलाले सहमति बेगर भिडिओ पोस्ट गरेर वेबसाइटले नाफा कमाएको आरोप लगाएकी छिन् ।

‘यो मुद्दा पोनोग्राफी हैन बरु यसले बलात्कारको मुद्दा आकर्षित गर्छ’ दायर गरिएको बयानमा उल्लेख छ । पीडितलाई क्षतिपूर्ति र आगामी दिनमा यस्तो हुन नदिन माग गर्दै मुद्दा दायर गरिएको हो । सो मुद्दामा आगामी दिनमा सहमतिमा तयार पारिएका भिडिओहरु मात्र पोस्ट गर्न माग गरिएको छ ।

माइन्डगिक कम्पनीअन्तर्गत अन्तर्गत पोर्नहब, रेडट्युव, यूपोर्न लगायत सयभन्दा बढी पोर्नग्राफी वेबसाइट संचालनमा छन् । ती साइटबाट कम्पनीले महिनौं साढे तीन अर्ब भ्युज बटुल्ने गर्छ । बिहीबार आयोजित पत्रकार सम्मेलनमा पीडितको प्रतिनिधित्व गर्दै मिचेल बोईले यो मुद्दालाई पोर्नोग्राफी उद्योगका लागि ‘भारी पर्न सक्ने क्षण’ बताए ।

प्रतिक्रिया

Leave a Reply

Your email address will not be published. Required fields are marked *