राहत लिएर हेलिकप्टरबाट हेलम्बु पुगिन् श्वेता

काठमाडौं । प्रभावितलाई राहत बाँड्न अभिनेत्री श्वेता खड्का शुक्रबार हेलिकोप्टरबाट हेलम्बु लगायत सिन्धुपाल्चोकका बाढीग्रस्त ठाउँ पुगेकी छिन् ।

श्वेता र उनको सामाजिक समूह चढेको प्रभु हेलिकोप्टरले खाद्यन्न र लुगाफाटोसहितका सहायता लिएर हेलम्बु, तिम्बु, चनौटे र तारामराङतर्फ गएको थियो । लगिएका खाद्यन्न विपद् प्रभावित बासिन्दालाई बाँडिएको श्वेताले जनाएकी छिन् ।

मेलम्चीसहित हेलम्बु लगायतका ठाउँमा बाढीपहिरोले पुर्‍याएको क्षतिको समेत श्वेताले हेलिकप्टरबाट अवलोकन गरिन् । उनले आकाशबाटै फेसबुकमा प्रभावित इलाकाको लाइभ गरेकी थिइन् ।

श्वेताले यसअघि सिन्धुपाल्चोकमै भूकम्प पीडितका लागि घरहरु पनि निर्माण गरेकी थिइन् । बाढीपहिरो गएपछि अहिले सामाजिक संजालमा श्वेताले राहत संकलन अभियान चलाएकी छिन् ।