मेलम्चीलाई सघाउन सेलेव्रिटीको ताँती : आँचल र मिलनले बाँडे राहत, श्वेता र पूजा आज जाँदै

काठमाडौं । बाढी प्रभावित सिन्धुपाल्चोक जिल्लाको मेलम्चीका बासिन्दालाई सघाउन सेलेव्रिटी पनि सक्रिय भएका छन् । उनीहरु मेलम्ची पुगेर खाद्यान्न, लत्ताकपडा र औषधि वितरण गरिरहेका छन् ।

कतिपय कलाकार मेलम्ची लगायत मुलुकका अन्य बाढीपहिरो प्रभावित थलो पुगेर सहायता वितरण गर्ने तयारी गरिरहेका छन् ।

विहिबार फिल्म गोर्खा वारियरका तर्फबाट निर्देशक मिलन चाम्स, अभिनेता रितेश चाम्स, अभिनेत्री आँचल शर्माका र उनका पति उदिप मेलम्ची पुगेर खाद्यान्न राहत प्रदान गरे ।

‘राहत वितरणमा राजनीति भएको र भाडामा बस्नेहरुले राहत नपाएको गुनासो सुनेपछि हामीले नगरपालिकालाई राहत सामग्री बुझायौं’ निर्देशक चाम्सले भने । चाम्सको टोली पहिरो प्रभावित लमजुङतर्फ प्रस्थान गर्ने कार्यक्रम छ ।

टेलिभिजन अभिनेता कुमार कट्टेल जिग्री ब्रोको टोली पनि मेलम्ची पुगेर राहत वितरण गरेको छ । उनीहरुले पीडितलाई चामल, ब्ल्यांकेट लगायतको सहायता प्रदान गरे ।

अभिनेत्रीद्धय श्वेता खड्का र पूजा शर्माले पनि मेलम्चीको बाढी पीडितलाई राहतको घोषणा गर्दै शुक्रबार त्यसतर्फ जाने बताएका छन् । अन्य कलाकार पनि बाढी प्रभावित थलोलाई सघाउन सक्रिय भएका छन् ।