सत्ता सम्हालेपछि पुटिनसँग वाइडेनको भेटवार्ता : दुबै नेताले गरे एकअर्काको प्रशंसा तर, सहमति जुटेन – Nepal Press

सत्ता सम्हालेपछि पुटिनसँग वाइडेनको भेटवार्ता : दुबै नेताले गरे एकअर्काको प्रशंसा तर, सहमति जुटेन

जेनेभा । सत्ता सम्हालेपछि पहिलोपटक अमेरिकी राष्ट्रपति जो बाइडेन र रुसी समकक्षी भ्लादमिर पुटिनबीच बुधबार भेटवार्ता भएको छ । वार्तापछि दुबै नेताले एकअर्काको प्रशंसा गरेपनि ठोस निष्कर्ष भने ननिस्किएको अन्तर्राष्ट्रिय संचारमाध्यमले जनाएका छन् ।

बाइडेनले पुटिनसँगको वार्तामा आफूले मतभेदका विषयहरुलाई शान्तपूर्वक प्रस्तुत गरेको र रुसले पनि अमेरिकसँग शीतयुद्ध नचाहेको बताएका छन् । पुटिनले पनि बाइडेन अनुभवी राजनेता भएको र आफूहरुले उस्तै भाषा प्रयोग गरेर बोलेको भन्दै प्रशंसा गरेका थिए ।

वार्ता पूर्वनिर्धारित तालिकाभन्दा तीनघण्टासम्म चलेको थियो । वार्ताका लागि आफूहरुले थप समय नचाहेको बताउँदै बाइडेनले रुससँगको सम्बन्ध सुधार्न इमान्दार प्रयत्न भैरहेको समेत बाइडेनले बताए ।

बाइडेनले आफूलाई मनपर्ने चस्मा एभिएटर लिएर वार्तास्थल पुगेका थिए । तर, उनले पुटिनलाई उपहार दिए वा दिएनन् भन्ने बाहिरिएको छैन । दुबै पक्षले परमाणु अस्त्र नियन्त्रणबारे छलफल गर्न आरम्भ गर्ने सहमति जनाएका छन् ।

एकअर्काको देशमा राजदूत पठाउने निर्णय पनि भएको छ । सन् २०२० को अमेरिकाको राष्ट्रपतिय चुनावमा रुसले हस्तक्षेप गरेको भन्दै चलेको आरोप प्रत्यारोपपछि दुबैले राजदूत फिर्ता गरेका थिए ।

साइवर सुरक्षा, युक्रेन र अढाइ वर्षको जेल सजाय काटिरहेका विपक्षी नेता एलेक्से नाभाल्नीको भविष्यजस्ता विषयमा भने कुनै सहमति भएको छैन ।

प्रतिक्रिया

Leave a Reply

Your email address will not be published.